Հանրային ծառայությունները կարգավորող հանձնաժողովի նախագահ Ռոբերտ Նազարյանը ծանր շաբաթ-կիրակի է անցկացրել: Թերթի տեղեկություններով, նախագահականից նրան «շիշն են» շարել գազի սակագնի մասին հայտարարության հաճար:

Շաբաթ օրը, Աժ-ում խոսելով գազի սակագնի մասին, նա ասել էր, թե դրա «վերանայման անհրաժեշտություն կլինի, հարկավոր է սպասել ու տեսնել, թե ինչ հայտեր կներկայացնեն լիցենզավորված ընկերությունները»:

Նազարյանը ասել է բացարձակ ճշմարտություն` բնակչությանը մատակարարվող գազի սակագինը վերանայվելու է և զգալիորեն բարձրանալու է: Բայց ամբողջ խնդիրն այն է, որ այդ մասին հիմա` նախագահական ընտրություններից առաջ ասել պարզապես չի կարելի:

Արդեն փաստ է, որ ՀՀ-ին մատակարարվող գազի գինը «Գազպրոմը» բարձրացրել է դեռ մեկ տարի առաջ` 180 դոլարից հասցնելով 220 դոլարի: Դրանից հետո պետք է բարձրանար նաև գազի ներքին սակագինը, բայց այդ «սյուրպրիզը» թողնվել է 2013թ. նախագահական ընտրություններից հետո:

Նազարյանը պահի տակ հաշվի չի առել գազի սակագնի ներքաղաքական «բաղադրիչը», ինչի համար էլ ծանր խոսակցություն է ունեցել «նախագահականի հետ»: