Էդմոն Մարուքյան. «Չկա մեկը այս շենքում, որ ինձ կասի, թե ինչպես քվեարկեմ եւ ինչ անեմ»
Անկախ պատգամավոր Էդմոն Մարուքյանը Աժ ամբիոնից նշեց, թե ինքն այս պահին մենակ է մնացել Ազգային ժողովում, քանի որ այս պահին 4 խմբակցություն՝ ԲՀԿ, ՀԱԿ, ՀՅԴ եւ «Ժառանգություն» խմբակցությունները հայտարարել են, որ չեն մասնակցելու Վարդան Օսկանյանին անձեռնամխելիությունից զրկելու գլխավոր դատախազի միջնորդագրի քվեարկությանը: Երեկ ԱԺ ամբիոնից ոչ կոալիցիոն ուժերին քվեարկությանը չմասնակցելու կոչով դիմեց ԲՀԿ-ական պատգամավոր Վահե Հովհաննիսյանը:
Էդմոն Մարուքյանը նշեց, որ սեպտեմբերի սկզբին, երբ ՀՅԴ-ական պատգամավոր Վահան Հովհաննիսյանը հայտարարեց չմասնակցել ԱԺ 12 խորհրդարանական մշտական հանձնաժողովների ձեւավորման քվեարկությանը, ԲՀԿ-ն կողմ քվեարկեց դրան եւ ձեւավորվեցին հանձնաժողովները:
«Չկա մեկը այս շենքում, որ ինձ կասի, թե ինչպես քվեարկեմ եւ ինչ անեմ: Ես պատասխանատու եմ միայն թիվ 30 ընտրատարածքի ընտրողների առջեւ»,-հայտարարեց Է. Մարուքյանը:
Այնուամենայնիվ, պատգամավորը հայտարարեց, որ դեռեւս Վարդան Օսկանյանի իշխանության մեջ եղած ժամանակ ինքը խոստացել է, որ եթե իր կարիքը ունենան նաեւ իշխանավորները, ինքը կպաշտպանի նաեւ նրանց:
Էդմոն Մարուքյանն ասաց, որ ինքը նպատակ չունի Վարդան Օսկանյանի փաստաբանի դերը ստանձնել, քանի որ նա ունի լավ փաստաբաններ, սակայն իր աջակցությունը հայտնեց պատգամավորին, «Սիվիլիթասին» եւ «Սիվիլնեթին», եթե պաշտպանության կարիքն ունեն: Այնուամենայնիվ, պատգամավորը խոստացավ իր վերաբերմունքն արտահայտել քվեարկությամբ:
Մեկնաբանություններ (3)
Մեկնաբանել