ՀՀ կենտրոնական բանկի 2011 թվականի դրամավարկային քաղաքականության ծրագրի կատարման հաշվետվության քննարկման ժամանակ ՀԱԿ խմբակցության պատգամավոր, նախկին վարչապետ Հրանտ Բագրատյանը բավականին կոպիտ ելույթ ունեցավ: Նա «կատարյալ աղբ» որակեց այդ հաշվետվությունը եւ դրա համար բերեց մի շարք փաստարկներ:

Ըստ պատգամավորի՝ Կենտրոնական բանկը լկտիացել է այն բանից հետո, երբ Սահմանադրության 83.3 հոդվածով կենտրոնական բանկի հիմնական խնդիրների մեջ մտավ գների կայունացման ապահովումը:  

Հրանտ Բագրատյանի խոսքով՝ վերջին տարիներին գները իրականում չեն կայունացել, քանի որ միջին գնաճը 7.7 % է, իսկ կենտրոնական բանկի 12-ամսյա գնաճը 4.7% է: «Բայց նույնիսկ այդ 7.7 %-ը վստահելի չէ եւ հավատ չի ներշնչում»,-ավելացրեց պատգամավորը:

Պատգամավորի խոսքով՝ այսօրվա բանկային համակարգը ծանրացել է տնտեսության վրա, առեւտրային բանկերը բավականին գերշահույթներ են ստանում: Հրանտ Բագրատյանի ասելով՝ բանկերը վարկերը տալիս են դոլարով եւ տոկոսադրույքները պահանջում են դրամով, չհաշված, որ տոկոսադրույքն էլ բավականին բարձր է: «Եթե ուզում եք բանկիր դառնալ, ընդունվեք գյուղինստիտուտ կամ անասնաբուժական ֆակուլտետ: Կենտրոնական բանկը թարախապալարի նման խոչընդոտում է տնտեսության զարգացմանը»,-ավելացրեց նախկին վարչապետը:

Հրանտ Բագրատյանը բավականին կոպիտ արտահայտվեց նաեւ վարչապետ Տիգրան Սարգսյանի հասցեին: Ըստ նրա՝ վարչապետը մինչեւ երկրի նախագահին, ժողովրդին չկործանի, պաշտոնից չի հեռանա:

Հրանտ Բագրատյանը կոչ արեց գլխավոր դատախազությանը զբաղվել Կենտրոնական բանկի միջոցով միլիարդավոր դրամների անհետացման գործերով, ոչ թե ընկնել Վարդան Օսկանյանի հետեւից, թե ինչպես ծախսի իր գումարները: