Արցախի կառավարության այսօրվա հերթական նիստի ժամանակ լրացումներ են առաջարկվել «ԼՂՀ վարչատարածքային բաժանման մասին» օրենքում՝ նպատակ ունենալով հստակեցնել Մարտունու և Մարտակերտի շրջանների ներքին ու արտաքին սահմանները:

Գործադիրը փոխել է Ասկերանի շրջանի Այգեստանի գյուղավան համայնքին պատկանող երկու հողատարածքի նպատակային նշանակությունը: Դրանցից մեկը՝ 1,1236 հեկտար մակերեսով գյուղատնտեսական հողակտորը, փոխադրվել է հասարակական կառուցապատման գործառնական նշանակության, մյուսը՝ 1,5 հեկտար արոտավայրը, կտրամադրվի գյուղատնտեսական արտադրական օբյեկտների կառուցման համար: Երկու հողատարածքն էլ կօտարվի աճուրդի միջոցով:

Նիստում քննարկվել է Արցախի հողային ֆոնդի առկայության և բաշխման 2012թ. հաշվետվությունը: Այս տարվա հուլիսի 1-ի դրությամբ, ըստ Անշարժ գույքի կադաստրի պետական կոմիտեի ներկայացրած փաստաթղթի, Արցախում գյուղատնտեսական նշանակության ավելի քան 593 հազար հեկտար տարածքից վարելահող է շուրջ 138 հազար հեկտարը:

Նիստը վարող վարչապետ Արա Հարությունյանը ներկաներին հիշեցրել է, որ Արցախում վարելահողերի մի զգալի մասը չի մշակվում և հատկապես համայնքապետների մեղքով: Նրանք հաճախ են այդ տարածքները թողնում արոտավայրերի տակ՝ փոխանակ հողօգտագործողներին աջակցելու, որպեսզի նրանք այդ հողատարածքները մշակեն՝ ըստ հարկի: Վարչապետը նշել է, որ համայնքների ղեկավարները պետք է շահագրգռված լինեն վարելահողերն ամբողջովին մշակելու հարցում՝ ստանձնելով գյուղատնտեսական եկամուտներն ավելացնելու հստակ պարտավորություն:

Արա Հարությունյանի խոսքով՝ անհրաժեշտ է քայլեր ձեռնարկել, որ նպատակային օգտագործվեն հատկապես գյուղամերձ հողատարածքները: Վարչապետը իրավասու մարմինների պատասխանատուներին հրահանգել է համայնքային բյուջեների կազմման ժամանակ հաշվի առնել վարելահողերից ստացվող հարկերն ու եկամուտները և ըստ այդ չափերի գնահատել համայնքապետերի աշխատանքը: Արա Հարությունյանը ցուցում է տվել անբավարար ցուցանիշների դեպքում նրանց զրկել աշխատավարձից և չտրամադրել նախատեսված դոտացիան:

Նիստում գործադիրը երեք որոշում է ընդունել ոստիկանության ոլորտի խնդիրների առնչությամբ: Կատարվել են փոփոխություն և լրացում կառավարության նախկին որոշումներից մեկում, ըստ որի՝ կուժեղացվի վերահսկողությունը տեղամասային տեսուչների կողմից՝ ԼՂՀ օրենսդրությամբ նրանց վերապահված իրավունքների և պարտականությունների կատարման նկատմամբ:

Մյուս որոշմամբ կատարված լրացումներով, մասնավորապես, սահմանվել է, որ պետական վիճակագրության մեջ որպես ճանապարհատրանսպորտային պատահարների հետևանքով զոհված են հաշվառվում այն անձինք, ովքեր մահացել են պատահարը տեղի ունենալու օրվանից 30 օրվա ընթացքում: Այս մասին հայտնում է Արցախի կառավարության տեղեկատվության և հասարակայնության հետ կապերի վարչությունը: