ԱԻԲԱ բռնցքամարտի երիտասարդների աշխարհի առաջնության նախապատրաստական աշխատանքները  գերազանց են գնահատել ԱԻԲԱ համակարգող կոմիտեի անդամները, որ երկօրյա աշխատանքային այցով գտնվում էին Երևանում: 

Հիշեցնենք, որ նոյեմբերի 25-ից դեկտեմբերի 8-ը Երևանը հյուրընկալելու է ԱԻԲԱ բռնցքամարտի երիտասարդների  աշխարհի առաջնության մասնակիցներին:

Համակարգող կոմիտեն ԱԻԲԱ ներկայացուցիչներից ձևավորված աշխատանքային խումբ է, որը նախապատրաստական աշխատանքներից սկսած մինչև առաջնության ավարտը հետևելու է, որպեսզի այս սպորտային միջոցառումն ընթանա ԱԻԲԱ ավանդույթներին եվ  չափանիշներին համապատասխան:

Կոմիտեի անդամները` ԱԻԲԱ սպորտային տնօրեն  Էմելին Գերբելը,  տեխնիկական պատվիրակ  Դեյվիդ Ֆրանսիզը և ԱԻԲԱ-ի տվյալների բազայի մենեջեր Ֆիլիպ Յուն, այս օրերի ընթացքում հանդիպումներ ունեցան ՀՀ սպորտի եվ երիտասարդության հարցերի նախարարության, Օլիմպիական կոմիտեի եվ բռնցքամարտի ֆեդերացիայի ղեկավարության հետ: Հյուրերն այցելել են այն մարզասրահները, որտեղ առաջնության օրերին մարզվելու մարզիկները, ուսումնասիրել են հյուրանոցային պայմանները,  ծանոթացել ինչպես մարզահամերգային համալիրի շենքային հնարավորությունների, այնպես էլ համալիրում այս պահին ընթացող աշխատանքների հետ:

«Այս կարճ ժամանակահատվածում իրականացված նախապատրաստական աշխատանքները  հիմք են տալիս ակնկալելու, որ ԱԻԲԱ բռնցքամարտի երիտասարդների աշխարհի առաջնությունը Երևանում կանցկացվի պատշաճ մակարդակով»,- գոհունակությամբ նշել են ԱԻԲԱ համակարգող կոմիտեի անդամները:

ՀԲՖ մամուլի ծառայություն