Այսօր Հայաստանում մեկ մարդու/օլիգարխի շուրթերից, աչքերից, ականջներից, ոտքերից, ձեռքերից ու գրպանից կախված այնքան կուսակցություն ու ՀԿ կա, որ, հոլանդացու ասած` «ծառերի հետևում անտառը այլևս չի երևում»:

Ես, որպես Սյունեցի, միշտ մտածել ու զարմացել եմ, թե որտեղի՞ց է գալիս մեր հարևան ազգի' Հայի, ազգային սարքովի շիզոֆրենիան. ազգային մտածելակերպի երկճեղքվածությունը, կամ սխալ որոշումներ կայացնելու շղթայական պատմությունը:

Ինչու մեր հարևան ազգը' Հայը, գլխավորը երկրորդականից չի տարբերել/տարբերում:

Օրինակ. Քաջարանում գործող ու Սյունիքի գլխին իսկական պատուհաս դարձած «Ձանգեզուրի պղնձամոլիբդենային կոմբինատը» (ԶՊՄԿ) ցանկանում է Կապան քաղաքից ընդհամենը մեկ կմ հեռու գտնվող Սյունիք գյուղի անմիջական հարևանությամբ հերթական մեծ պոչամբարը կառուցել ու շահագործել. բան չմնաց, որ «արդար» ԶՊՄԿ-ն պայմանագիրը պարտադրի Սյունիք գյուղի գյուղապերարանին: ԶՊՄԿ-ն արդեն իսկ շահագործում է Կապանի մոտ գտնվող ու ազգային աղետի վերածված Արծվանիկի ահավոր, բաց, 300 հա տարածք կուլ տված պոչամբարը:

Իսկ ահա Կապանում գործող «ոչ թունավոր» "Deno Gold Mining Company"-իին տրամադրվել է Սյունիքի տարածքի մոտ 7%-ը: Վերջինս շահագործում է Կապանի մոտ գտնվող Գեղանուշի բաց ու ահավոր պոչամբարը: Սա դեռ քիչ է, հիմա էլ "Deno Gold"-ը ցանկանում է Կապան քաղաքի գլխի Շահումյանի հանքը բաց կերպով շահագործել:

Եթե սրան գումարենք ուրանի ուրվականը հարավային Սյունիքում, ապա ընդհանուր պատկերը բոլորին պարզ է դառնում:

Այսինքն' Հայաստանի ու աշխարհի համար գերստրատեգիական հարավային Սյունիքը մարդաթափում են. վեր են ածում անապատային թափոնավայրի:

Իսկ ահա Երևանյան մի քանի սուտի-մուտի «հայրենասիրական» ՀԿ-ներ ամբողջ օրը կոկորդ են պատռում սեռական փոքրամասնությունների մասին ցուցադրվելիք ընդհամենը տեղեկատվական ոմն մի ֆիլմի դեմ - «հայրենասերները պայքարում են օտար քարոզչության» դեմ. հեշտ թիրախների և կեղծ-ցուցադրական հայրենասիրության ամուսնություն: Այս մարդիկ «չեն հասկանում», որ չես կարող քո ու քո ընտանիքի համար պահանջել օրինական պետություն, երբ որ (ոչ մի օրենք չխախտող) քո համաքաղաքացիներին փորձում ես զրկել նույն օրինական պետության հիմք հանդիսացող սահմանադրական հավասար իրավունքներից:

Ակամայից հիշեցի ձեր քաղաքախորթմայր Երևանի մայթերի վրա գծված «հեծանվորդների ուղիները». մարդիկ փողոցներում քիչ են վրաերթի ենթարկվում, հիմա էլ մայթերին:

Օրինակները շատ են, բայց հոգնեցի:

Այո, դուք Հայ եք ու ձեզ Հայ են ասում. բայց պատմությունը հենց այստեղ էլ ավարտվում է:

Վարազ Սյունի
Ամստերդամ
11.10.2012