Արդեն մոտ 10 օր է` Ալավերդիում համատարած բնակարանային գողություններ են կատարվում: Գողերը զինված են բնակարանների փականները բացելու հատուկ սարքով: Օրը ցերեկով բնակարններից գողություն կատարողները միջահասակ, 26-27 տարեկան թիկնեղ 2 երիտասարդ են: Հոկտեմբերի 3-ին նրանք եղել են սպիտակ և կապույտ վերնաշապիկներով:

Գողերը բնակարաններ մտնում են օրվա ցերեկային ժամերին: Համարձակորեն բացում են, անգամ հարևանի տուն մի քանի րոպեով մտած տանտիրոջ տան փականը և ճարպկորեն բնակարանից գողանում են միայն ոսկի և փող: Այլ թանկարժեք իրեր գողերի ուշադրությանը չեն արժանանում:

Վերջին 10 օրվա ընթացքում նույն ձեռագրով բնակարանային գողություններ են կատարվել Ալավերդու Ս/Սարահարթ թաղամասի 2/26, 1/1ա, 1/24, 1/14, 2/32 և այլ շենքերի բնակիչներից: Բնակիչների անունները չենք հրապարակում` նրանց անվտանգության շահերից ելնելով:

Քանի որ գողերը զինված են բնակարանների դռները բացելու ամենակարող սարքավորումներով, գողերից տուժած էլի շատ ալավերդցիներ վախենում են իրենց բնակարանային գողությունների պատճառած վնասների մասին բարձրաձայնել`իրենց բնակարանների և ընտանիքի անդամների հետագա ավտանգությունը չվտանգելու համար:

Սարահարթի 2/26 շենքի բնակարաններից մեկից դուրս գալու ժամանակ հոկտեմբերի 3-ին` ժամը 12:10 –ին, շենքի շքամուտքի 3-րդ հարկից տանտիրուհին նկատում է իր տան դռան փականի վրա աշխատող, սպիտակ վերնաշապիկով, թիկնեղ, կարճ խուզած մազերով, 26-27 տարեկան մի երիտասարդի: Երբ 3-րդ հարկից նա հարցրել է, թե ով է և ինչ է ուզում, գողը փախել է:

Տանտերը նրանց հետևից դուրս է եկել բակ, սակայն գողերը արդեն հեռացած են եղել:  Չի բացառվում` գողերը Ալավերդի ժամանել են այլ քաղաքից, սական ակնահայտորեն նրանք Ալավերդիում ունեն ուղղորդողներ և հովանավորներ: Ցավալին այն է, որ գողերը մտնում են ոչ թե Ալավերդու մեծահարուստների բնակարաններ, այլ իրենց աշխատանքով հանապազօրյա հացի փող աշխատող ալավերդցիների բնակարաններ և նրանցից գողանում են նրան ընտանիքի հացի փողը, հիվանդների դեղորայքի գումարները, ինչպես նաև կենսաթոշակառուների թոշակները: Գողերը հիմնականում բացում են միայնակ բնակվող կանանց բնակարնների դռները:

Ստեղծված իրավիճակում Ալավերդիում համատարած վախի մթնոլորտ է: Սակայն ալավերդցիները անիմաստ են համարում իրենց բնակարաններից կատարված գողությունների մասին տեղեկացնել ՀՀ ոստիկանության Լոռու մարզային վարչության Թումանյանի բաժնին: Տուժածներից ոմանք գտնում են, որ գողերը կապված են ոստիկանության աշխատողների հետ, այլապես օրը ցերեկով այդպես ցինիկաբար չեն մտնի անպաշտպան քաղաքացիների բնակարաններ: Իսկ ոստիկանության Թումանյանի բաժնի ուռճացած ոստիկականական անձնակազմը գողերի հայտնաբերման և ալավերդցիների անվտանգությունը ապահովելու գործում առայժմ անգործության է մատնված: