Քասախ գետի վրա՝ Օշական գյուղի տարածքում, կամուրջ կկառուցվի
Վարչապետ Տիգրան Սարգսյանի հանձնարարականով կառավարությունը հրատապ ծրագրի շրջանակներում Արագածոտնի մարզի Օշական գյուղում կառուցվելիք կամրջի շինարարության համար հատկացրել է համապատասխան ֆինանսական միջոցներ: Կամուրջը նախատեսված է ինչպես մարդատար, բեռնատար մեքենաների, այնպես էլ հետիոտնի համար:
Օշական համայնքի բնակիչները վարչապետին ուղղված նամակով խնդրել էին կամուրջ կառուցել Քասախ գետի վրա՝ Օշականի մանկական առողջարանի հարևանությամբ:
Խնդիրն այն է, որ համայնքի շուրջ 2000 շահառու չի կարողանում մշակել 400 հա տարածքը, քանի որ կամրջի բացակայության պատճառով՝ բերքահավաքի ժամանակ հնարավոր չէ բերքը որևէ ձևով տեղափոխել: Կամրջի կառուցման արդյունքում գյուղատնտեսության համար պիտանի այս հողատարածքում գյուղացիները կկարողանան աշնանացան կազմակերպել:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել