«Հետքի» հարցերին պատասխանում է ԱԺ բնապահպանության եւ գյուղատնտեսության հարցերի մշտական հանձնաժողովի փոխնախագահ, ՀՀԿ խմբակցության պատգամավոր Տաճատ Վարդապետյանը: 

Վերջին մեկ տարվա ընթացքում բնապահպանական ՀԿ-ներն ու բնապահպանական ակտիվիստները ակտիվ նախաձեռնություններով են հանդես գալիս եւ բարձրաձայնում են բնապահպանական մի շարք խնդիրներ: Ձեր հանձնաժողովը երբեւէ հետամուտ եղե՞լ է բարձրացված խնդիրների նկատմամբ:

Իհարկե, միանշանակ հետամուտ եղել է, լինում է եւ պիտի լինի: Մենք հանդիպումներ ենք ունենում տարբեր հասարակակական կազմակերպությունների հետ, որոնք առնչվում են բնապահպանական խնդիրների հետ: Հանդիպում ենք ունենում նաեւ անհատների հետ, որոնք նույնպես մտահոգ են բնապահպանական խնդիրներով: Այնպես որ խորհրդարանի բնապահպանության եւ գյուղատնտեսության մշտական հանձնաժողովը ականջալուր է այն խնդիրներին, որոնք առնչվում են մտահոգություններին, այդ թվում՝ բնապահպանական:

Հանձնաժողովում բարձրացված բնապահպանական խնդիրների վերաբերյալ երբեւէ քննարկումներ եղե՞լ են:

Մենք ունեցել ենք հանդիպումներ, որտեղ այդ խնդիրները բարձրացվել են: Ես ընդմենը 2 ամիս է ինչ հանձնաժողովի անդամ եմ: Մինչեւ իմ ընդգրկվելն էլ է հանդիպումներ եղել, հիմա էլ է նախատեսվում: Հիմա ձեռնարկվում է, որ լսումներ կազմակերպվեն եւ ՀԿ-ների հետ նորից հանդիպենք եւ քննարկենք տարբեր խնդիրներ:

Պարոն Վարդապետյան, Ձեզ դուր գալի՞ս է կառավարության վարած բնապահպանական քաղաքականությունը:

Այսօր կան խնդիրներ, որոնք պետք է իրենց լուծումները ստանան, համենայնդեպս պետք է բնապահպանական խնդիրները հաշվի առնելով կառավարության ծրագրերը կյանքի կոչել: Ինչ վերաբերում է դուր գալուն, ասեմ, որ ամեն դեպքում համագործակցում ենք կառավարության հետ եւ կարծում եմ արդյունավետությունը ավելի պիտի բարձրանա, որպեսզի առանց վերոնշյալ խնդիրների, առանց բնապահպանական վտանգավոր գործունեության իրականացվեն այդ ծրագրերը:

Որպես հանձնաժողովի անդամ կարո՞ղ եք նշել մի քանի բնապահպանական խնդիրներ, որոնք Ձեզ մտահոգում են:

Այս պահին դժվարանում եմ այդ խնդիրների ամբողջ շարքը թվարկել, բայց իրականում կան խնդիրներ, որոնք պետք է ամենայն մանրամասնության քննության առնվեն:

Թեղուտը, փոքր ՀԷԿ-երը, Խոսրովի արգելոցը եւ այլ հարցերը խնդիրներ չե՞ն:

Այդ ուղղությամբ օրենսդրության մեջ փոփոխություններ են արվել, մեր հանձնաժողովը դրական եզրակացություն տվել է, որ այլեւս Սեւան թափվող գետերի վրա արգելվի ՀԷԿ-երի կառուցումը: Կարծում եմ դա դրական քայլ է, որ կանխենք Սեւանի ձկնապաշարների վերացումը եւ ընդհակառակը նպաստենք աճին:

Միայն Սեւան մտնող գետերի վրա ՀԷԿ-եր կառուցելու արգելքը բավարա՞ր է խնդրին լուծում տալու համար:

Ամեն դեպքում ես դրական եմ համարում այդ քայլը, որ արգելք է դրվելու: Կարծում եմ այո, բավարար է լինում:

Երբ բողոքի տարբեր ակցիաներ են լինում, ինչու՞ բնապահպանության եւ գյուղատնտեսության հանձնաժողովի անդամները տեղում չեն հանդիպում բողոքավորների հետ եւ փորձում համատեղ ուժերով խնդրին լուծում տալ:

Արդեն ասացի, որ պատրաստակամ ենք համագործակցել, մարդկանց, կազմակերպությունների հետ, որպեսզի ըստ արժանավույն քննարկենք այն վտանգները, որոնք սպառնում են մեր բնապահպանությանը:

Կարո՞ղ ենք ասել, որ առաջիկայում Ձեզ կտեսնենք այն «թեժ կետերում», որտեղ բնապահպանական ակցիաներ են լինելու:

Չեմ կարծում, որ մեր միակ ուղղությունը դա է: Եթե աշխարհագրորեն չհայտնվենք այդ վայրերում, ապա անպայման այդ մարդկանց հետ, խմբերի հետ անպայման կհանդիպենք ու քննարկումներ կունենանք: Կարելի է ասել՝ հանձնաժողովում քննարկվելու է եւ հանձնաժողովը իրազեկ է լինելու այդ ամենին:

Այսինքն՝ գրասենյակայի՞ն աշխատելաոճի կողմնակից եք:

Ինչու՞ գրասենյակային, նաեւ գնալ, այցելել մարզեր: Անցյալ տարի ես չկայի այս հանձնաժողովում, բայց Ազգային ժողովի նախագահի հետ մենք գնացինք Թռչկանի ջրվեժ եւ այցի արդյունքում կանխվեց բնության հուշարձանի նկատմամբ ոտնձգությունները: Այնտեղ նույնպես պետք է ՀԷԿ կառուցվեր եւ այսօր Փառք Աստծո ընդհատված է: Այնպես, որ մենք միայն գրասենյակում չենք աշխատում: Առանց Թռչկանի ջրվեժը տեսնելը դժվար կլիներ համապատասխան վերաբերմունք դրսեւորելը:

Մի խումբ բնապահպանական ակտիվիստներ եւ ոլորտով զբաղվող ՀԿ-ներ պահանջում են բնապահպանության նախարարի հրաժարականը, պատճառաբանելով, որ նա ոլորտին չի տիրապետում եւ երբեմն բնապահպանության դեմ է գործում: Համաձա՞յն եք այդ տեսակետին:

Միանշանակ համաձայն չեմ, դա բնապահպանների եւ մի խումբ մարդկանց որոշելիքը չէ: Որպես բնապահպանական հանձնաժողովի փոխնախագահ տեսնում եմ բնապահպանության նախարարության ակտիվ աշխատանքը: Գուցե կան որոշակի խնդիրներ, որոնք պետք է ստանան իրենց լուծումները, ինձ թվում է ժամանակը այդ խնդիրների լուծման օգտին կաշխատի:

Օրինակ, նախարարությունն ի՞նչ ակտիվ աշխատանք է կատարել, որ Ձեզ դուր է եկել:

Կարո՞ղ եմ իմ մատերս ծալել եւ մեկ առ մեկ թվարկել, բնականաբար, ոչ:

Գոնե մեկը նշեք:

Համենայնդեպս դեմ եմ այն կարծիքին, որ բնապահպանության նախարարությունը կամ նախարարը չեն աշխատում: Ինչ վերաբերում է թվարկելուն, ուղղակիորեն այդ հարցին դժվարանում եմ պատասխանել: Դրանք այնքան շատ են ու բազմատեսակ եւ ամբողջ գերատեսության աշխատանքը չնկատել, դա արդար չի:

Իսկ եթե խնդիրնեն ավելի շատ են, քան դրանց լուծումները:

Ուրեմն պահանջվում է ավելի հետեւողական աշխատանք, եթե իրականում դա այդպես է: Ցանկացած ոլորտում էլ կան խնդիրներ, այդ թվում բնապահպանության նախարությունում: Այսօր բնապահպանության նախարության եւ Ազգային ժողովի գլխադասային հանձնաժողովի միջեւ ներդաշնակ աշխատանք է ընթանում եւ համագործակցում ենք: