Արտակարգ իրավիճակների նախարարության հակակարկտային կայաններն աշխատում են մոտ 80% արդյունավետությամբ։ Tert.am-ի հետ զրույցում այս մասին ասաց ԱԻՆ «Մթնոլորտային երևույթների վրա ակտիվ ներգործության ծառայության» ՊՈԱԿ-ի տնօրեն Ռոբերտ Հովսեփյանը։ Ըստ նրա՝ այսօր Հայաստանում ԱԻՆ-ը սպասարկում է շուրջ 118 այդպիսի կայան, ևս 50 կայան տեղադրել և սպասարկում են մասնավոր ընկերություններ։ «Այդ մասնավոր կայանների՝ տեխնիկական անվտանգության կանոններին համապատասխանությունը վերահսկել ոչ ոք չի կարող, չնայած վարչապետը դեռ 2009թ. հայտարարեց՝ ակնհայտ է, որ արդյունավետ չեն և պիտի փոխվեն կամ հիմնովին նորոգվեն»,- նշեց նա։ Այն հարցին, թե վերջերս քննադատություն էր հնչել, որ հակակարկտային գլխիկները ճիշտ չէ լիցքավորել բութանով, այլ, ինչպես դրանք նախատեսված են եղել, ացետիլով է պետք գործարկել, Հովսեփյանը պատասխանեց. «Ացետիլը վտանգավոր, պայթյունավտանգ նյութ է և թունավոր, բույսերի համար խիստ վնասակար, իսկ մենք ոչ թե բութանով ենք լիցքավորում, այլ պրոպանի ու բութանի որոշակի խառնուրդով։ Էդ ասողը, մեղմ ասած, ոչ գյուղատնտեսությունից ա բան հասկացել, ոչ՝ քիմիա իմացել»։ Ըստ Հովսեփյանի՝ այս տարի տեղացած կարկուտը չի կարելի համարել մեծ աղետ, այն չի եղել ընդգրկուն։ «Մենք չենք ունեցել ձվաչափ կարկուտ, ու չի կարելի ասել, թե տեղումներն էլ շատ են եղել»,- նշեց նա։ Բերքին հասցված վնասներին անդրադառնալով՝ մասնագետը նշեց. «Գիտե՞ք էն ասացվածքը՝ «Արտը խախուտ, մահանեն կարկուտ»՝ մեր գյուղացին պարարտանյութի, բուժանյութի փող չուներ, մշակումները նորմալ չի կարողացել անի, ասում ա՝ բերքը կարկուտը տարավ»։