Այսօր ՀՀ գյուղատնտեսության նախարար Սերգո Կարապետյանն աշխատանքային այցով Շիրակի մարզում էր: Նախարարին ուղեկցում էր «Գյուղատնտեսական ծրագրերի իրականացման գրասենյակ» պետական հիմնարկի   տնօրեն Գագիկ Խաչատրյանը: 

Այցելության նպատակը «Համայնքների արոտավայրերի կառավարման և անասնապահության զարգացման» ծրագրով  մարզի Մեծ Մանթաշ, Ջրառատ և Սառնաղբյուր համայնքներում իրականացվող  ջրարբիացման համակարգերի շինարարության ընթացքին ծանոթանալն էր: 

Եթե Ջրառատ համայնքում 3300 հա արոտների ջրարբիացման  աշխատանքներն արդեն ավարտված են, ապա Մեծ Մանթաշի 4900 հա արոտների ջրարբիացման համար նախատեսվող  շինարարությունն իրականացվել է 90, 4200 հա արոտների համար նախատեսվող  աշխատանքները Սառնաղբյուրում`  80 % -ով: 

Նշված համայնքների ղեկավարները,  արոտօգտագործողների սպառողական կոոպերատիվների նախագահները  և վարչության անդամները նախարարի  հետ հանդիպման ժամանակ իրենց գոհունակությունն արտահայտեցին իշխանությունների կողմից գյուղացիներին աջակցելու նման ծրագրերի իրականացման վերաբերյալ, հույս հայտնելով, որ դրանք շարունակական են լինելու: ՀՀ գյուղատնտեսության նախարարը նույնպես  կարևորեց ծրագրի իրականացման անհրաժեշտությունը` նշելով, որ արոտավայրերի կառավարման և անասնապահության զարգացման ծրագիրն այն կարևոր հարթակն է, որով հնարավորություն կլինի օժանդակել գյուղացու եկամուտների ավելացմանը. «Իսկ դրա համար առաջին հերթին անհրաժեշտ է բարձրացնել  կովերի միջին կաթնատվությունը, որն այսօր Սառնաղբյուրում ընդամենը 1200, Ջրառատում 1300, Մեծ Մանթաշում 1500 լիտր է»,- նշեց նախարարը:

Շիրակի մարզում այս  ծրագրի մեջ, նշված երեքից բացի,   ընդգրկված են ևս վեց այլ համայքներ` Աղինը, Հառիճը, Լեռնակերտը, Բերդաշենը, Այգաբացն ու Բասենը: