![](/static/articles/02/03/l-dDQNvXd0lR.jpg)
Հայաստանը ցանցային պատրաստվածությամբ աշխարհում 109-րդն է
Համաշխարհային տնտեսական ֆորումը հրապարակել է «Տեղեկատվական տեխնոլոգիաների համաշխարհային զեկույց 2010/11»-ը: Զեկույցում ներկայացված է Հայաստանի ցանցային պատրաստվածության համաթիվը:
Հայաստանը ցանցային պատրաստվածության ցուցանիշով աշխարհում 109-րդն է և նախորդ տարվա համեմատությամբ զիջել է իր դիրքերը 8 հորիզոնականով, չնայած բացարձակ արժեքով գնահատականը աճել է 0.04 միավորով:
Հարկ է նաև նշել, որ այս տարի զեկույցում ընդգրկված երկրների քանակը նախորդ տարվա համեմատ աճել է հինգով:
Զեկույցը ցույց է տալիս երկրների տեղեկատվական և հեռահաղորդակցական տեխնոլոգիաների զարգացումներին մասնակցելու և դրանցից օգտվելու պատրաստվածության աստիճանը:
«Տնտեսություն և արժեքներ» հետազոտական կենտրոնը, որպես Համաշխարհային տնտեսական ֆորումի (ՀՏՖ) համաշխարհային մրցունակության ցանցի գործընկեր, մասնակցում է վերջինիս կողմից պատրաստվող զեկույցներին:
Այս զեկույցի հիմքում ընկած է ցանցային պատրաստվածության համաթիվը, որը ցույց է տալիս երկրների տեղեկատվական և հեռահաղորդակցական տեխնոլոգիաների զարգացումներին մասնակցելու և դրանցից օգտվելու պատրաստվածության աստիճանը, որն էլ նպաստում է մրցունակության բարձրացմանը:
Զեկույցը հրապարակվում է արդեն 10 տարի: Այս տարի այն գնահատել է աշխարհում 138 տնտեսությունների ՏՏ մրցունակությունը:
ՀՏՖ-ի գնահատականներով ցանցային պատրաստվածության տեսանկյունից լավագույն արդյունքներն են գրանցել Շվեդիան, Սինգապուրը և Ֆինլանդիան:
Առաջին երկուսը պահպանել են նախորդ տարվա իրենց դիրքերը, մինչդեռ Ֆինլանդիան առաջադիմել է 3 հորիզոնականով:
Նախորդ տարի 3-րդ տեղում գտնվող Դանիան թուլացրել է իր դիրքը` զբաղեցնելով 7-րդ հորիզոնականը:
Ինչպես և նախորդ տարի, լավագույն հնգյակում են Շվեյցարիան և ԱՄՆ-ն (համապատասխանաբար 4-րդ և 5-րդ հորիզոնական):
Ընդհանուր առմամբ, Հայաստանում նահանջ է արձանագրվել ցուցանիշի բոլոր 3 բաղադրիչներում, որոնցից յուրաքանչյուրում Հայաստանի դիրքերն անկում են գրանցել 6 տեղով:
Ցանցային պատրաստվածության ցուցանիշով Հայաստանը շարունակում է անբարենպաստ դիրք զբաղեցնել անգամ ԱՊՀ երկրների շրջանում: Նշված համադրելի երկրների շարքում ընդհանուր ցուցանիշի դրական տեղաշարժ է արձանագրվել Ղազախստանում, Ռուսաստանում և մասնավորապես Ղրղզստանում, մինչդեռ մյուս երկրների դիրքերը վատթարացել են համաշխարհային ՏՏ վարկանիշայում ցանկում:
Ամենամեծ անկումը գրանցվել է Ուկրանիայում` 8 հորիզոնականով (նույնքան, որքան որ Հայաստանում):
Հարևան Վրաստանն ու Ադրբեջանը, չնայած նույնպես զիջել են իրենց դիրքերը, այնուամենայնիվ, շարունակում են Հայաստանից առաջ գտնվել համապատասխանաբար 11 և 39 հորիզոնականով:
Մեկնաբանել