Նոյեմբերի 12-ին Գյումրիի «Հոկտեմբեր» կինոթատրոնում տեղի ունեցավ նորընտիր քաղաքապետ Սամվել Բալասանյանի եւ 21 ավագանիների երդմնակալության խորհրդանշական արարողությունը: Ինչու խորհրդանշական, քանի որ, ըստ օրենքի, տեղական ինքնակառավարման մարմինների նոր կազմը երդմնակալության արարողակարգը կատարում է ավագանու առաջին նիստի ժամանակ: Գյումրիի նորընտիր ավագանին իր առաջին նիստը կգումարի նոյեմբերի 22-ին, որտեղ առաջնահերթ կքննարկվի քաղաքապետարանում անկախ աուդիտ հրավիրելու հարցը: 

«Անելու ենք ամեն ինչ անկաշառ, ճիշտ, բարոյական արժեքների հենքի վրա,-խոստացավ նորընտիր քաղաքապետ Սամվել Բալասանյանը,-այո, լինենք ազնիվ, արդար, խոսքի ազատություն բերենք ժողովրդին, բարոյահոգեբանական մթնոլորտը փոխենք եւ իրականացնենք այն ծրագրերը, որ կընտրենք թափանցիկ` ժողովրդի համաձայնությամբ: Մենք պիտի հաշվետու լինենք բնակչությանը, մարդիկ պիտի իմանան, թե ինչ ենք արել ու որքան ենք ծախսել: Այն, ինչ եղել է, թողնում ենք հետին պլան, գիծ ենք քաշում, ճահիճը չենք մտնում, կյանքը առաջ է ընթանում»:

Առաջիկա՝ 2013թ.-ի անելիքների ցանկից Գյումրիի քաղաքապետն առանձնացրեց երեք հիմնական ծրագրեր, որոնք փոքր բյուջեով, թեկուզ հանգանակության միջոցով, ձգտելու են իրականացնել: Քաղաքապետը հայտարարեց, որ քաղաքի մուտքի մոտ մեծ կամար է կառուցվելու, որպես հզորության խորհրդանիշ: Ավարտին է հասցվելու Ամենափրկչի կառուցումը, վերակառուցվելու է կենտրոնական հրապարակը:

«Քաղաքի փոշուց պիտի ազատվենք: Ես համամիտ եմ այս մտքի հետ, բայց ուրիշ փոշիներ էլ կան, որոնցից պետք է ազատվել,- խորհուրդ տվեց Շիրակի թեմի առաջնորդ Միքայել եպիսկոպոս Աջապահյանը,-քաղաքի փոշին հեշտ է թոթափել, բայց կան փոշիներ, որ ավելի դժվար է, եւ ես կկամենայի, որպեսզի քաղաքապետը եւ ավագանին ձեռք ձեռքի տված այդ փոշիները թոթափեին`կեղծավորության, շողոքորթության, մեղավորության, ստախոսության փոշին թոթափեն, լինեն խոնարհ ծառայողներ: Երեք կարեւոր բան է պետք քաղաքապետին եւ ավագանուն հաջողության հասնելու համար`ծառայություն, ծառայություն եւ դարձյալ ծառայություն: Պաշտոնը վայելելու համար չէ, պաշտոն` նշանակում է ծառայություն: Պաշտոնավարել կնշանակե, թե ծառայել ժողովրդին»:

Երդմնակալության մասնակիցներից Մարտին Թադեւոսյանը նորընտիր քաղաքապետին հանձնեց ղեկավարման այն բանալին, որը 1967թ-ին քաղաքի ղեկավար Գեւորգ Ղարիբջանյանը նվիրել էր սոցիալիստական աշխատանքի հերոս Արտյոմ Միկոյանին: Բանալին դեպքերի բերումով ի պահ էր տրվել Մ. Թադեւոսյանին: Վերջինիս կարծիքով, Սամվել Բալասանյանն այն արժանին է, ում պիտի հանձնվեր այդ բանալին: Թեմի առաջնորդը օրհնեց ու քաղաքապետին հանձնեց խորհրդանշական շղթան` նշելով, որ այն զարդ չէ, ինչպես, որ զարդ չի համարվում եպիսկոպոսի պանակեն, այլ լուծ, որ պիտի կրի համայնքի ղեկավարն ու անտրտունջ ծառայի ժողովրդին: