Ես, անկեղծ ասած, հուսով էի, որ այս հայտարարությամբ հանդես գալու կարիք չի լինի, քանի որ կարծում էի, որ ՀՀ արդարադատության նախարարը, լինելով բարեկիրթ անձնավորություն, ում համար մարդու իրավունքներին և եվրոպական արժեքներին հարգանքով վերաբերվելը սկզբունքային է, պատասխանատվություն կդրսևորի և առնվազն ներողություն կխնդրի իր կողմից հնչեցրած արտահայտությունների համար, քանի որ գրեթե համոզված էի, որ նման որակումները պարզապես սայթաքում են, ինչից, իհարկե, որևէ մեկս ախահովագրված չենք: Խոսքս վերաբերում է բանտարկյալների կողմից ինքնախեղման երևույթները սովորական որակելուն:

Ցավոք, պետք է նշեմ, որ նախարարի կողմից իր կողմից հնչեցրած ձևակերպումներին անդրադարձ չեղավ, ինչն էլ հիմք է տալիս ենթադրել, որ այդ ձևակերպումները նախարարի համար օրինաչափ են:

Իհարկե, չէի ցանկանա որակումներ անել, այնուհանդերձ պետք է նշեմ, որ առնվազն պատասխանատու չէ նման մոտեցումը իրավիճակի և մարդկանց նկատմամբ: Պետք է շեշտեմ, որ նման մոտեցումը հիմք է տալիս ենթադրություններ անել այն մասին, թե ինչպիսին է արդարադատության նախարարի վերաբերմունքը քրեակատարողական համակարգի ու կալանավորների նկատմամբ:

Արդարադատության նախարարությունը կոչված է ուսումնասիրել նման դեպքերը, կատարել խորքային վերլուծություններ: Միայն ասել, թե այդ դեպքերը կապված են քրեական գործերը դատապարտյալի կողմից արդարացի կամ ոչ արդարացի համարելու հետ, պարզապես անընդունելի է: Իսկ միգուցե ժամանակն է ուսումնասիրել այն պատճառները, թե ինչու են դատապարտյալների մեծամասնությունն անարդարացի համարում հարուցված քրեական գործերը, դատավճիռները: Սովորական երևույթ չէ, երբ մարդը կտրում է իր մատը: Սովորական երևույթ չէ, երբ կարում է բերանը: Սովորական երևույթ չէ, երբ մարդ փորձում է այդ եղանակով բարձրաձայնել անարդարությունը, երբ մարդ փորձում է մյուսների ուշադրությունը գրավել այն խնդիրների վրա, որոնց մասին մենք բոլորս էլ շատ լավ գիտենք:

Իհարկե, դատապարտյալների կողմից կարող են սուբյեկտիվ մոտեցումներ լինել, բայց երբ նրանք դիմում են ինքնախեղման, սա ահազանգ է, որպեսզի համակարգն ի վերջո ուշադրության արժանանա:

Եվ վերջում, ես ուզում եմ մնալ իմ համոզմունքին, որ նախարարի արտահայտությունը պարզապես սայթաքում էր, և՛ դատապարտյալները, և՛ նրանց ընտանիքները դեռևս կարժանան նրա կողմից հնչեցրած ներողությանը:

ԱԺ մարդու իրավունքների պաշտպանության եւ հանրային հարցերի մշտական հանձնաժողովի նախագահ

Էլինար Վարդանյան