ՀՀ փոխվարչապետ, տարածքային կառավարման նախարար Արմեն Գեւորգյանն այսօր ընդունեց Համաշխարհային բանկի (ՀԲ) պատվիրակությանը՝  Հայաստանում ջրամատակարարման եւ ջրահեռացման ոլորտի ծրագրերի ղեկավար Ահմեդ Իհվեյդայի գլխավորությամբ:

Քննարկվեցին ջրամատակարարման եւ ջրահեռացման համակարգում իրականացվող ծրագրերի ընթացքին վերաբերող հարցեր, անդրադարձ եղավ ոլորտի զարգացման հեռանկարներին:

Ա. Իհվեյդան տեղեկացրեց, որ հանդիպումներ է ունեցել օպերատոր ընկերությունների, դոնոր կազմակերպությունների ներկայացուցիչների հետ, ծանոթացել կատարվող աշխատանքներին` միաժամանակ գոհացուցիչ համարելով արձանագրված արդյունքները: Նա դրական համարեց նաեւ իրականացվող ծրագրերին կառավարության ցուցաբերած աջակցությունը:

Կողմերը կարեւորեցին համակարգում բարեփոխումների շարունակումը` արձանագրելով, որ ավելացել է նաեւ ոլորտով հետաքրքրվող դոնոր կազմակերպությունների թիվը: Պայմանավորվածություն ձեռք բերվեց համակարգի կառավարման սցենարների մշակման վերաբերյալ: Փոխվարչապետը ՀԲ գործընկերներին առաջարկեց փորձագիտական մակարդակով սկսել աշխատանքները, որպեսզի գարնանն արդեն որոշակի տեսլական ներկայացվի կառավարությանը:

Անդրադարձ եղավ նաեւ Հայաստանին ՀԲ-ի կողմից  տրամադրվող բյուջետային օժանդակության վարկին, մասնավորապես, ջրամատակարարման եւ ջրահեռացման ոլորտում իրականացվող աշխատանքների հետ կապված պայմաններին:

Հասարակայնության հետ կապերի բաժին