Մարիամ Կարապետյան

Եվ ամեն տեղ տեսանելի է,

որ սերը եկել է.

փառաբանության ձգտում,

ոգեհունչ Օվսաննա…

Երբ հավասարություններն են դառնում

առավոտ շուտ

ինչպես և ծնվում են

գետերի, հեքիաթների մասին

կեսից լռելու անխախտությունից… 

Պահը կեսին է,

մինչև հոտը կգա…

***

Հենց սկզբից ձայները

լույսերի մեջ մտնել կարողացան.

քնած մարդկանց խաղալիքներ էին

դրանք…

Եվ ի~նչ թանկ էին իրերը…

Սահունություն տարածքների

և հավակնումների լիություն…

***

Պտույտ՝ մինչև ուշացող մի ոտք,

և քո լողացող ու հրող խարիսխները…

Լայն պաստառներ՝

խաղաղ օրերի համար…

***

Դու

բոլոր րոպեներին հերթով կգաս

բոլոր ազատ տեղերում…

պետք է օրհներգել առավոտը

նրա գալուց առաջ…

հարմարվել ձայներին ու դրախտներին…

Օրորվելու տեղ դիր

առավոտյան արթնացման հետքը…

***

Չթափվի

քամու միջի ջուրը…

(Պտուղը տեղավորվում է քամու մեջ

ու չփչփացնում է ջուրը)…

***

Շողը

գոյությունը

տևումը

թռիչքը

կորերի արանքով…

առաջին վանկերի ռիթմը…

լուսամփոփի մոտավորությունը

քնի մոտավորությունը

թևերը բարձրացնելու մոտավորությունը

և գալիք բոլոր խաղաղությունները…

***

Սենյակային բոլոր ալիքներն օրորոցի…

Իրերի կարգավորումը մինչև

ճանաչելի վայրեր…

***

Կիսադեմերի նմանությունը

ծննդյան օրերի առթիվ…

Հոտով ճանաչվող ժամանում…

Խաղաղություն ձյան մեջ

ու ծնունդի մեջ,

Տե՛ր…

***

Երբեմն

բոլոր բառերը

ազատ տեղադրված են

մայրերի թիկունքում…

Առավոտ`

մայրերի ժամանակ…

***

Կանխասացություն առավոտի ու նկարների

գալու հետ կապված հին խոսքեր

բառեր, որ տատանում են թարթիչները

փխրուն արթնացման թրթռոց…

***

Ծառերը՝

մինչև կետերը

բարձր պատուհանների մեջ…

Կաթը ցայտում է ճյուղերի արանքները…

Օրորոցից առավոտ ձգվող կարոտ.

թռչնի ուժ…

***

Մենք ճոճվեցինք միասին

ժամացույցների առաջ,

որովհետև հրեշտակները երևի

ժամացույցների վրա են նստում:

Մենք խաղում էինք,

իսկ դու մեծանում էիր…