Գյումրու նորընտիր ավագանու առաջին նիստը գումարվեց քաղաքապետ Սամվել Բալասանյանի ընդարձակ աշխատասենյակում: Նախքան նիստը սկսելը քաղաքապետն առաջարկեց 1 րոպե լռությամբ հարգել ծնունդով գյումրեցի, ճանաչված երգչուհի Ֆլորա Մարտիրոսյանի հիշատակը: Այնուհետև հնչեց ՀՀ հիմնը, և Սամվել Բալասանյանը ավագանու անդրանիկ նիստը համարեց բացված:

Նիստի օրակարգը բավական հագեցած էր: Նախատեսված 12 հարցից «Ընդհանուր ֆինանսատնտեսական աուդիտ իրականացնելու անհրաժեշտության մասին» կետը Սամվել Բալասանյանն առաջարկեց հանել և քննարկել հաջորդիվ կայանալիք նիստերից մեկում:

«Քանի որ ներկայում քաղաքապետարանում ստուգումներ են իրականացնում Ֆինանսների նախարարությունից և մարզպետարանի մի շարք վարչություններից, բացի դրանից՝ մենք էլ գույքագրում ենք անում, որ տեսնենք՝ ինչ ունենք, ապա նպատակահարմար եմ համարում այս հարցը քննարկել հետո, երբ կունենանք նաև ստուգումների արդյունքները»,- պարզաբանեց քաղաքապետը՝ հավելելով, որ մեկ հարց հանել են, սակայն դրա փոխարեն ևս 3 լրացուցիչ հարց ներկայացրել են քննարկման:

Ավագանու նիստի օրակարգը հաստատելուց հետո Սամվել Բալասանյանն առաջարկեց կարգ սահմանել ելույթների, հարցերի ու պատասխանների համար՝ համապատասխանաբար սահմանելով 5, 2 և 3 րոպե ժամանակ: Օրինակ բերելով Ազգային ժողովում իր փորձը՝ քաղաքապետը խոստացավ հետևել, որ որևէ մեկը սահմանված կարգը չխանգարի: «Ես վայրկյանաչափ ունեմ ու չեմ թողնելու՝ որևէ մեկը սահմանված ժամանակից շատ խոսի»,- նշեց Սամվել Բալասանյանը:

Գյումրու քաղաքապետարանի աշխատակազմ համայնքային կառավարչական հիմնարկ ստեղծելու, հիմնարկի կանոնադրությունը և աշխատակազմի կառուցվածքը հաստատելու մասին կետի վերաբերյալ զեկույցը լսելուց հետո, ինչպես և նախորդ զեկուցողների դեպքում, ավագանու անդամներից միակ ընդդիմադիրը՝ Լևոն Բարսեղյանն, այս անգամ էլ հանդես եկավ հարցապնդումներով:

Նրան հետաքրքրում էր, թե ինչ հիմնավորումներ կան նման թվաքանակով աշխատակազմ պահելու, ինչու պետք է քաղաքապետն ունենա 2 տեղակալ, ոչ թե մեկը, ինչը նախատեսված է օրենքով, արդյոք կարիք կա պահելու 5 խորհրդական, գուցե 2-ն էլ է բավարար և այլն:

Նշենք, որ Գյումրու քաղաքապետարանը ունենալու է 691 աշխատակից: Աշխատավարձերը չափավոր են, իսկ ահա հաստիքների առումով, ըստ ավագանու անդամ Լևոն Բարսեղյանի, բավական ուռճացված են: Քաղաքապետ Բալասանյանի աշխատավարձը կազմելու է 270 հազար դրամ, նրա երկու փոխքաղաքապետներինը՝ 216 հազար դրամ: Հինգ խորհրդականից յուրաքանչյուրը ստանալու է 180 հազար դրամ աշխատավարձ: Քաղաքապետարանում առկա բաժնի պետերը կստանան 180 հազարական, իսկ առաջատար և առաջին կարգի մասնագետները՝ 60-80 հազար դրամ: Քաղաքապետի տեղակալներից մեկը (թե որը՝ դեռ հայտնի չէ) ունի օգնականի կարիք, և այդ օգնականի աշխատավարձն էլ սահմանված է 170 հազար դրամ:

Լևոն Բարսեղյանի հարցապնդմանը, թե ինչու է քաղաքապետը որոշել ունենալ 5 խորհրդական, այլ ոչ թե 3 կամ 10, պատասխանեց Գյումրու նորընտիր քաղաքապետը: Սամվել Բալասանյանն ասաց, թե ստեղծել են ճարտարապետների խորհուրդ և այն ղեկավարելու համար հրավիրել ճարտարապետ Սաշուր Քալաշյանին: Քաղաքի ճարտարապետական դեմքի վերաբերյալ որոշումներն այլևս միանձնյա չեն կայացվելու, թեև նախորդ քաղաքապետի օրոք միանձնյա էին կայացվում: Բացի դրանից՝ ստեղծվել է արտաքին հարաբերությունների բաժին: Խորհրդականների թիվը պայմանավորված է նորաստեղծ բաժիններով:

Նախկին քաղաքապետի օրոք հողատարածքների և «Չայկա» մակնիշի մեքենայի օտարումների վերաբերյալ որոշումները չեղյալ համարելու որոշումները ևս դրվեցին ավագանու քննարկմանը: 100 հազար դրամով օտարված «Չայկայի» կրկնակի գնահատման արդյունքում պարզվել է, որ մեքենան արժեցել է 4 մլն 500 հազար դրամ:

Օրակարգում ընդգրկված հարցերի մեծ մասի քվեարկությունն անցնում էր 20 կողմ, 1 դեմ կամ ձեռնպահ ձայների հարաբերակցությամբ: Ավագանու անդամներից միայն Լևոն Բարսեղյանն էր, որ օրակարգի յուրաքանչյուր կետի հետ կապված ուներ հարցեր, և միակն էր, որ քվեարկում էր դեմ կամ ձեռնպահ: