«Կույր կնոջը փորձել են ստիպողաբար տանել հոգեբուժարան» հոդվածին արձագանքել է նաև միջադեպի մասնակից Սոնայի մայրը՝ Մարիամ Հարությունյանը: Ստորև ներկայացնում ենք վերջինիս՝ «Հետքին» փոխանցած գրությունը.

«Ինչպե՞ս կարելի է առանց հակառակ կողմը լսելու նման հոդված գրել և մեղադրել: Այստեղ են ասել` «Սելը ճռալու տեղը սելվորն է ճռում»:

Ես Սոնայի մայրն եմ և գտնում եմ, որ այդ կնոջ նման մարդկանց վտանգավոր է փողոց թողնել: Որովհետև կույր կինը ինչպե՞ս կարող է առանց ուղեկցողի հայտնվել փողոցում, այն էլ «1 տարեկան 11 ամսական» երեխայի հետ: Եթե այդ կինը ուրիշ նպատակ չունի` բացի մարդկանց փորձանքի մեջ գցելուց: Որովհետև ո՞վ է տեսել «1 տարեկան 11 ամսական» երեխային նկարչական դպրոց հաճախելիս:

Ես կպատմեմ այն, ինչ լսել եմ աղջկանիցս և Կենտրոնի ոստիկանությունում: Աղջիկս այդ օրը համալսարան դասի է գնալիս եղել 36-Ա երթուղայինով: Դավիթաշեն թաղամասում այդ կինը երեխայի հետ քիչ է մնացել ընկնի մեքենայի տակ: Մի կերպ բարձրացել է երթուղային ու սկսել հարցնել, թե ինչպես կարելի է հասնել Օպերա՝ Պուշկին հատվածը: Աղջիկս տեսել է, որ ոչ ոք չի արձագանքում, մոտենում է և առաջարկում իր օգնությունը` մտածելով, որ ինքը իջնում է Օպերա, կմոտենա ոստիկանին, որոնք կօգնեն կնոջը հասնելու իր ուզած վայրը, քանի որ կինը կույր է և փոքրիկ երեխայի հետ: Իսկ ինքը կգնա իր դասին:

Այն խոսքը, որ իբր աղջիկս ասել է, թե ճանաչում է այդ կնոջը, սուտ է: Ուղղակի աղջիկս ցանկացել է կատարել իր քաղաքացիական պարտքը՝ օգնել կնոջը, որը, ըստ իս, ցանկացած քաղաքացու պարտքն է` հաշմանդամներին օգնել: Օպերայի կանգառում միասին մոտեցել են համազգեստով ոստիկանին, աղջիկս բացատրել է իրավիճակը, խնդրել է ոստիկանին օգնել կնոջը: Ոստիկանները չեն թողել Սոնային հեռանալ:

Այնուհետև խոսելով կնոջ հետ չգիտես ինչու հասկացել է, թե կնոջը պետք է հասնել մինչև Աղի հանք: Կինը անկանոն շարժումներ է արել և աննորմալ բաներ խոսել: Այդ ընթացքում Սոնան անընդհատ ուզել է հեռանալ, բայց ոստիկանները պահանջել են սպասել: Այնուհետև տաքսի մեքենա են կանգնեցրել, կնոջը դրել մեջը, որը իր հետևից քարշ է տվել նաև աղջկաս` ամուր բռնելով ձեռքը, այնքան ամուր, որ եղունգները մտել են Սոնայի ձեռքի մեջ:

«Կույր» կինը արագ փակել է մեքենայի ամրակները: Ոստիկանը, ուշադրություն չդարձնելով դրա վրա և նույնիսկ այն բանին, որ Սոնան չի ուզում և չի կարող ուղեկցել կնոջը, վճարել է տաքսու վարորդին և ասել, որ տանի Աղի հանք: Բացի այդ, հեռախոսահամարը տվել է աղջկաս, որպեսզի տեղ հասնելուն պես զանգի:

Երբ այդ ոստիկանը ասել է տաքսու վարորդին` տար Աղի հանք, այդ կինը հարձակվել է Սոնայի վրա` հասցնելով տարբեր մարմնական վնասվածքներ, այնքան ուժեղ, որ Սոնան ամբողջությամբ արյան մեջ կորել է (մեջբերում` մեզ հետ զրույցում Սոնայի մայրը նշել է, որ այն ժամանակ, երբ վարորդը ևս մեկ անգամ հարցրել է` թե ուր տանի նրանց, Սոնան պատասխանել է նրան` Աղի հանք: Եվ միայն դրանից հետո է Նաիրան վերջնականապես հանգել այն մտքին, որ իրեն փորձում են հոգեբուժարան տանել իր կամքին հակառակ և ծեծել է այդ աղջկան: Իսկ մեր այն հարցին, թե ինչու է Սոնան վարորդին ասել` մեզ տարեք Աղի հանք, նրա մայրը պատասխանել է, որ իր աղջիկը միամտաբար կրկնել է ոստիկանի խոսքերը, չիմանալով անգամ, որ այդ «Աղի հանք» ասվածը հոգեբուժարան է և մտածելով, որ հավանաբար կույր կինը ոստիկանին այդ վայրն է նշել իրեն հասցնելու համար-Կույր կնոջը փորձել են ստիպողաբար տանել հոգեբուժարան հոդվածի հեղ. Ն. Ալեքսանյան):

Տաքսու վարորդը, տեսնելով, թե այդ «կույրը» ինչ է անում, մի կերպ կանգնեցնում է մեքենան Մաշտոց-Թումանյան խաչմերուկում, ձեռքով պահելով նրան՝ օգնում աղջկաս դուրս գալ մեքենայից: Այդ խաչմերուկում աղջիկս վախեցած, շփոթված, արյունլվա վիճակում է լինում: Նրան են մոտենում այլ ոստիկաններ, որոնք օգնում են նրան հասնել Կենտրոնի ոստիկանություն, որտեղ գործ է կազմվում: Աղջիկս այնքան վախեցած վիճակում էր գտնվում: Այստեղ են ասել՝ «ում էի մի կտոր հաց տվել»: Փառք աստծո, աղջկաս վերքերը ապաքինվեցին: Բայց այն, որ մարդկանց օգնել պետք չէ, դա արդեն դաս դարձավ նրա համար:

Եվ դեռ ասում եք, որ այդ կնոջը վնաս են պատճառել և այդ կինը տուժո՞ղ է: Ասացեք խնդրեմ՝ ով է տուժել այս պարագայում: Մարդը, որ փորձել է օգնել հաշմանդամին, թե կինը, որը (Նաիրան կարողանում է տեսնել լույսն ու ստվերը - «Հետք») կույր ձևանալով՝ փորձում է չգիտես թե ինչ վտանգավոր մտքեր իրագործել, մարդկանց կյանքը վտանգելով կամ մարդկանց անմեղ տեղը փորձանքի մեջ գցելով:

Ոստիկանությունում Սոնային առաջարկեցին բողոքել այդ կնոջ դեմ, սակայն աղջիկս հրաժարվեց` ասելով, որ արդեն իսկ կյանքը պատժել է այդ կնոջը: «Նաիրայի և իր դստերն «օգնել» ցանկացող աղջկա` Սոնայի հաշվով ոստիկանությունում ասել են, որ վերջինս անչափահաս է, և նրա դեմ գործ չեն կարող հարուցել». այս արտահայտությունը կատարյալ սուտ է»:

Հ. Գ. «Հետքն» այս թեմային առաջիկայում դեռ կանդրադառնա: