Պետեկամուտների կոմիտեի տվյալներով՝ 2008-ից մինչ օրս Հայաստան են ներկրվել այնպիսի յուրատեսակ մսատեսակներ, ինչպիսիք են եղջերուի, եղնիկի, ջայլամի, կոկորդիլոսի միսը, գորտի թաթիկները: Ճիշտ է՝ ծավալները մեծ չեն, սակայն դելիկատես համարվող այս սննդատեսակներից հատկապես գորտի թաթիկները միշտ էլ եղել են ներմուծվող ապրանքների շարքում: 

Մասնավորապես ազգային վիճակագրական ծառայության համաձայն, որը հավաքագրում է տվյալները ՊԵԿ-ից, 2008-ին Հայաստան է ներկրվել 90 կգ գորտի թաթիկ, որի արժեքը կազմել է 715 դոլար: Նույն տարում մեր երկիր է մտել նաեւ 87,8 կգ որսի միս (բացի ճագարից, նապաստակից, լորից). արժեքը կազմել է 3167 դոլար: 

2009-ին ՀՀ է ներմուծվել 5500 դոլար արժողությամբ 108,9 կգ հյուսիսային եղջերուի միս, նաեւ՝ 480 դոլարի 60 կգ գորտի թաթիկներ:

2010-ին ներկրվել են միայն գորտի թաթիկներ՝ 348 կգ, արժեքը՝ 2942 դոլար: Նույնը եղել է նաեւ 2011-ին՝ 144 կգ՝ 963 դոլար ընդհանուր արժեքով:  

ՊԵԿ-ի փոխանցմամբ` նույն ժամանակահատվածում (01.01.2008-22.11.2012) Հայաստան չի ներկրվել ինչպես փղի, այնպես էլ, ասենք, կետի, ընձուղտի, կապիկի, դելֆինի, սողունների, ջրային խոզուկի, կրիայի  միս:

Հատկանշանական է, որ մսեղենի այս տեսակների մասով Հայաստանը բացառապես ներկրող երկիր է, չնայած մեր երկրում տեղական գորտի մսի բիզնես կա: