«Հետքի» հարցմանը «Վալլեքս» խմբի ընկերությունների տեղեկատվության և  հասարակության հետ կապերի բաժնից գրավոր պատասխանեցին, որ 2008-2011թթ.-ին Թեղուտի լեռնահարստացուցիչ կոմբինատի կառուցման և պղինձ-մոլիբդենային հանքավայրի շահագործման ծրագրի իրականացման նպատակով նախատեսված 357 հա անտառից անտառահատում է իրականացվել 75 հա գումարային մակերեսով տարածքներում: 

«2012թ.-ի  ընթացքում  իրականացված  անտառահատումների գումարային  մակերեսը կարող է կազմել մինչև 40 հա: Ճշգրտված տվյալները հայտնի կլինեն  մինչև 2013թ.-ի փետրվար ամիսը»,- նշված է պատասխանի մեջ: 

Թեղուտի և Շնողի անտառների ծառերի  փայտանյութի իրացումը իրականացնում է «Հայանտառ» ՊՈԱԿ-ի «Լալվար» անտառտնտեսությունը:

Փայտը պահեստավորվում է Շնող գյուղի «Շեկ աբյուրներ» կոչվող հանդամասի բացօթյա պահեստում: «Լալվար» անտառտնտեսության հաշվապահությունից  տեղեկացանք, որ այս տարվա հունվարի 1-ից նոյեմբերի 1-ը Թեղուտի և Շնողի անտառների պլանային հատումներից «Շեկ աղբյուրներ» հանդամասի պահեստ մուտքագրվել է 7 729 խմ փայտ, որից 89 խմ-ն  եղել է շինափայտ:  Պահեստից  վաճառվել է  6768  խմ, որից 27 խմ-ն` շինափայտ: Փայտի մեկ խմ-ն (ավելացված արժեքի հարկը ներառյալ) վաճառվում 12 հազար դրամով: Ըստ  «Լալվար» անտառտնտեսւթյան հաշվապահության տվյալների` պահեստից փայտի վաճառքից առաջացած 69 մլն  319 հազար դրամը մուտքագրվել է  պետբյուջե:  

«Շեկ աղբյուրների» պահեստում ամբարված մնացել և չի վաճառվել Թեղուտի և Շնողի անտառների վերջին 4 տարիներին հատված և պահեստավորված 1020 խմ փայտ:

Փայտանյութը արևից ու անձրևից փչանում  է:  «Լալվար» անտառտնտեսության գլխավոր անտառապետ Արամ Ռամազյանը «Հետքին» հայտնեց, որ  խնդիրը մտահոգում է նաև իրենց անտառտնտեսության  ղեկավարությանը:

«Չորս տարի շարունակ պահեստում թափված և չվաճառվող  հսկայական փայտակույտերի մասին մենք մի քանի անգամ տեղեկացրել են  «Հայանտառ» ՊՈԱԿ-ին, սակայն, որևէ հրահանգավորում այդպես էլ  չենք ստանում»,- ասում է գլխավոր անտառապետը:  

Չվաճառվող փայտանյութը փչացնելու փոխարեն կառավարությունը կարող է որոշում կայացնել եւ այն անվճար հատկացնել տարածաշրջանի սոցիալապես  անապահով բնակչությանը: