Կառավարությունը այսօրվա նիստում Լոռու, Շիրակի և Արագածոտնի մարզերի գյուղական բնակավայրերում, ինչպես նաև Դիլիջան քաղաքում մեկ սենյակի շահառու ճանաչված ընտանիքների բնակարանային պայմաններն ուղղակի ֆինանսական աջակցության տրամադրման միջոցով բարելավելու նպատակով հատկացրել է 1 մլրդ 146 մլն դրամ։

Այդ գումարով բնակարանային պայմանները կարող է բարելավել 382 ընտանիք։

Ֆինանսավորումն իրականացվում է Ռուսաստանի կողմից Հայաստանի Հանրապետությանը 2009 թ. տրամադրված պետական վարկի միջոցների հաշվին' կայունացման դեպոզիտային հաշվից։

2012 թ. պետբյուջեում կատարելով վերաբաշխում, փոփոխություններ և ավելի վաղ ընդունած որոշման մեջ լրացումներ' գործադիրը նաև հնարավորություն է ստեղծել, որ այս տարի ավարտին հասցվի ՀՀ պաշտպանության նախարարության կողմից Բալահովիտում կառուցվող 33 բնակարանով բնակելի շենքի շինարարությունը։