Ուսումնավարժության երկրորդ (գործնական) փուլը մեկնարկեց Երևանի կայարանամերձ հրապարակում գտնվող կիսակառույց հյուրանոցային համալիրի շենքում, որտեղ, ըստ սցենարի, տեղի է ունեցել փլուզում, փլատակներում են մնացել մարդիկ և անհրաժեշտ է շենքի վերին հարկերից տարհանել մարդկանց: Շենքում բռնկվել է հրդեհ: Նույն հրապարակի ոստիկանության նախկին հենակետի մոտ բեռնատարը բախվել է մարդատարին. Կան տուժածներ:

Ուսումնավարժության գործնական փուլում ընդգրկվել են Երևանի փրկարարական վարչության հրշեջ-փրկարարական ջոկատները և քաղաքի հերթապահ ծառայությունների խմբերը:

Պայմանական դեպքի վայր ժամանեց չորս մարտական հաշվարկ, երկու ավտոսանդուղք և շտապօգնության չորս բրիգադ: Հետախուզության արդյունքում պարզվեց, որ շենքում կան տասնյակ «տուժածներ»: Հրշեջ-փրկարարներն անմիջապես սկսեցին հրդեհաշիջումն ու այրվող մասնաշենքից ու փլատակներից տուժածների դուրսբերումը: Ցուցադրելով իրենց մասնագիտական hմտությունները` վերին հարկերի պատշգամբներից հատուկ ջոկատի փրկարարները տուժածներին անվտանգ դուրս բերեցին` ավտոսանդուղքների և պարանների միջոցով։ Ողնաշարի վնասվածք ունեցող մեկ «տուժածի» փրկարարնեն իջեցրին պատգարակի օգնությամբ։ Կային նաև ավտովթարի հետևանքով «տուժածներ», որոնց  հրշեջ-փրկարարները հատուկ գործիքների օգնությամբ դուրս բերեցին վթարված մեքենաներից: Բոլոր տուժածներին հանձնեցին շտապօգնության բրիգադներին:

Տուժած բնակչությանը տարհանեցին անվտանգ տարածք: Վիրավորներին ցուցաբերվեց առաջին բուժօգնություն։ 

Ուսումնավարժության գործնական փուլին ներկա էր ԱԻ նախարար Ա. Երիցյանը, ով լրագրողների հետ զրույցում ասաց.

- Ուսումնավարժությունն անցկացվեց բարձր մակարդակով և ծառայեց իր նպատակին: Հրշեջ-փրկարաներն իրենց առաջադրանքը կատարեցին գերազանց: Մեր երկիրը գտնվում սեյմաակտիվ գոտում: ՀՀ տարածքում ուժեղ երկրաշարժեր եղել են և լինելու են,  ուստի մենք պետք է ստեղծենք աղետակայուն պետություն: Նման միջոցառումները բոլորիս սովորեցնում են արտակարգ իրավիճակներում ճիշտ գործել: Ուսումնավարժության ամբողջական գնահատականը կտրվի մանրակրկիտ վերլուծությունից հետո: