ՀՀ Տավուշի մարզի Գետահովիտ համայնքի բնակիչները Պաղջուր (Խաչաղբյուր) գետի վրա արդեն իսկ կառուցված «Խաչաղբյուր- 1» և կառուցվող «Խաչաղբյուր-2» ՓՀԷԿ-երի շուրջ առաջացած խնդիրների վերաբերյալ 2012 թ. նոյեմբերի 22-ին գրավոր դիմել են ՀՀ նախագահ Սերժ Սարգսյանին: Նշյալ դիմումը ստորագրել է համայնքի թվով 1077 բնակիչ, ովքեր կտրականապես դեմ են արտահայտվել նոր ՓՀԷԿ-ի կառուցմանը, իսկ արդեն իսկ գործող «Խաչաղբյուր-1»-ի վերաբերյալ՝ հետագա շահագործմանը:

ՀՀ Նախագահի աշխատակազմը, փոխարենը քննարկման առարկա դարձնելու համայնքի բնակիչների դիմում-բողոքը, ուղղակիորեն այդ դիմումը վերահասցեագրել է ՀՀ Բնապահպանության նախարարությանը, որտեղից էլ պետք է ստացվի պատասխան: Այս աշխատելաոճը խոսում է այն մասին, որ ՀՀ նախագահի աշխատակազմը նույնպես անտարբեր է մեր հանրապետության շրջակա միջավայրի և/կամ համայնքներում առկա հիմնախնդիրների և դրանց լուծման ուղղությամբ տարվող աշխատանքների նկատմամբ:

Այնպիսի տպավորություն է, որ Գետահովիտ համայնքի բնակիչները ՀՀ բնապահպանության նախարարության գտնվելու վայրը չգիտեին: Նրանք չեն դիմել ՀՀ բնապահպանության նախարարին, քանի որ վստահ ու համոզված են, որ գործող նախարարն ի զորու չէ որևէ բան փոխել կամ բարեփոխել ՀՀ բնապահպանության ոլորտում, նրա կողմից ղեկավարվող այդ նախարարությունն իրեն վաղուց սպառել է, և ժամանակն է, որ այն լուծարվի, եթե այդ նախարարին որևէ ձևով պաշտոնանկ անելու համարձակություն չկա:

ՀՀ Բնապահպանության նախարարությունը, որպես կանոն, ժամանակին չի արձագանքում ցանկացած դիմումի, ցուցաբերում է բացահայտ անգործություն և անտարբերություն այն ոլորտի հարցերի նկատմամբ, որոնց համար ինքը կոչված է զբաղվելու, կարգավորելու և կանխարգելելու, մշտադիտարկում կատարելու և այլն: Այսպիսով, նրա գործելակերպն առաջին անգամ չէ, որ ապացուցում է ոլորտին առնչվող հարցերի լուծման նկատմամբ իր շահագրգռվածության բացակայությունը:

Ինչպես հայտնի է, մինչև ՀՀ նախագահին դիմում ներկայացնելը Գետահովիտ համայնքի բնակիչների և մեր նախաձեռնության կողմից ներկայացված հիմնավորումների հիման վրա ՀՀ բնապահպանության նախարարը ս. թ. հոկտեմբերի 26-ի. հ. 277-Ա հրամանով ուժը կորցրած է ճանաչել (չեղյալ էր համարել) «Մեգաէներջի» ՍՊԸ-ը տրված «Խաչաղբյուր 2» ՓՀԷԿ-ի կառուցման աշխատանքային առաջին նախագծի շրջակա միջավայրի վրա ազդեցության փորձաքննության 23.08.2012թ. հ. ԲՓ 70 դրական եզրակացությունը:

Սակայն դրանից հետո ՀՀ բնապահպանության նախարարությունն իր պաշտոնական կայքէջում տեղադրում է հայտարարություն, ըստ որի՝ ս. թ. նոյեմբերի 21-ին «Մեգաէներջի» ՍՊԸ-ը ՀՀ բնապահպանության նախարարության «Բնապահպանական փորձաքննություն» ՊՈԱԿ-ին է ներկայացրել «Խաչաղբյուր 2» ՓՀԷԿ-ի աշխատանքային նախագծի փոփոխված տարբերակը, իսկ ս. թ. դեկտեմբերի 6-ին Գետահովիտ համայնքում պետք է անցկացվեն հանրային լսումներ:

Ի դեպ, հարկ ենք համարում նշել, որ «Մեգաէներջի» ՍՊԸ-ի՝ «Բնապահպանական փորձաքննություն» ՊՈԱԿ-ին ներկայացրած «Խաչաղբյուր 2» ՓՀԷԿ-ի աշխատանքային նախագծի փոփոխված տարբերակը կրկին կազմել է աշխատանքային առաջին նախագծի հեղինակ «ԷՌԱ» ՍՊԸ-ն, որը ակնհայտ կեղծ և իրականությանը չհամապատասխանող տվյալներ ու տեղեկություններ էր ներկայացրել առաջին աշխատանքային նախագծում և ապակողմնորոշել բոլոր շահագրգիռ կողմերին:

Փաստորեն, առանց համապատասխան գնահատական տալու նախորդ աշխատանքային նախագիծը կազմող ընկերության և/կամ նրա փորձագետի կողմից թույլ տրված խախտումներին, այդ նախագծին դրական բնապահպանական փորձագիտական եզրակացություն տված նախարարության աշխատակիցների և անկախ փորձագետի գործողություններին՝ ՀՀ բնապահպանության նախարարությունը որոշում է կայացրել ացկացնել նոր հանրային լսումներ:

Այն էլ այն դեպքում, երբ հասարակական ճնշման տակ տվյալ ՓՀԷԿ-ի կառուցման հետ կապված տարաձայնություններն ուսումնասիրելու և ծագած խնդիրներին լուծումներ առաջարկելու նպատակով ՀՀ բնապահպանության նախարարի 16.10.2012թ. հ. 254-Ա հրամանով ստեղծվել էր աշխատանքային խումբ (որի կազմում ընդգրկված են նաև մեր նախաձեռնության երկու անդամներ և Գետահովիտ համայնքի երկու բնակիչներ), որը 16.10.2012թ. ՀՀ բնապահպանության նախարարին ներկայացրել էր թվով 5 առաջարկություն, որից միայն մեկն է մինչև օրս ի կատար ածվել:

Այսինքն ընդամենը չեղյալ է ճանաչվել Մեգաէներջի» ՍՊԸ-ը տրված «Խաչաղբյուր 2» ՓՀԷԿ-ի կառուցման աշխատանքային առաջին նախագծի շրջակա միջավայրի վրա ազդեցության փորձաքննության 23.08.2012թ. հ. ԲՓ 70 դրական եզրակացությունը, իսկ մյուս առաջարկների վերաբերյալ մինչև օրս որևէ պատասխան չի տրվել:

Առ այսօր անպատասխան են մնացել նաև մեր նախաձեռնության կողմից ՀՀ բնապահպանության նախարարին հասցեագրված 2 դիմումները, որոնց պատասխանելու օրենքով սահմանված ժամկետներն արդեն անցել են:

Մեր նախաձեռնության պահանջը մնում է նույնը՝ չեղյալ ճանաչել կամ հետաձգել ս. թ. դեկտեմբերի 6-ին Գետահովիտ համայնքում «Խաչաղբյուր 2» ՓՀԷԿ-ի աշխատանքային նախագծի փոփոխված տարբերակի շուրջ հանրային լսումներ անցկացնելու մասին հայտարարությունը, մինչև որ ստացվեն վերը նշված առաջարկությունների վերաբերյալ լիարժեք պատասխաններ, և տրվեն իրավական գնահատականներ ու լուծումներ:

ՀՀ բնապահպանության նախարարությունից ակնկալում ենք գործուն միջամտություն և ռեալ քայլեր, որոնք ուղղված կլինեն շրջակա միջավայրը պահպանելուն և փրկելուն, այլ ոչ թե բիզնես միջավայրի զարգացում՝ հանրության առողջ շրջակա միջավայրում ապրելու իրավունքի հաշվին:

«Թռչկան» քաղաքացիական նախաձեռնություն
Ֆեյսբուքյան խումբ
04.12.2012