Բանից պարզվում է՝ Ավանում ընտրություններին մասնակցել են նաեւ հոգեկան հիվանդները (Ավանում հոգեբուժարան կա): Տեղամասերից մեկում նրանցից մեկը հայտարարել է, թե ինքը ՀՀ նախագահն է ու պիտի արտահերթ քվեարկի, մյուսը պնդել է, որ ինքն էլ կառավարության անդամ է եւ այլն:

«ՉԻ»- Տարոն Մարգարյանի աներձագը կարող է հպարտանալ. փաստորեն ՀՀ նախագահն անձամբ է նրան ընտրել: Ավելին, մեր տեղեկությունների համաձայն, նրան ընտրել են նաեւ երեք Նապոլեոններ, երկու Ստալին, մեկական Նյուտոն ու Չինգիզ խան, ինչպես նաեւ մի քաղաքացի, ով անընդհատ պնդում էր, թե Սերժ Սարգսյանն արդար ընտրությունների արդյունքում է դարձել նախագահ: Ըստ երեւույթին, հենց այս վերջինիս էլ նկատի ունենալով՝ հանձնաժողովի անդամներից մեկը պարզաբանել է, որ իրենք չեն կարող արգելել հոգեկան հիվանդների մուտքը տեղամասեր: 

Ամեն դեպքում, լավ է, որ իշխանություններն օգտագործել են նաեւ այդ ռեսուրսը: Ավելի լավ է հոգեկան հիվանդները ձայն տան իշխանություններին, քան ընտրությունների արդյունքների հրապարակումից հետո ամբողջ աշխարհը մեզ հոգեկան հիվանդների տեղ դնի: