Տերմինալի միջոցով գազի սպասարկման համար հոկտեմբեր ամսվա վճարումը կատարելիս տեսա, որ գազի սպառած էներգիայի գումարը 4620 դրամ է: Թիվն իսկապես զարմացրեց, քանի որ այդ տանը, որի գազի սպասարկման համար վճարում էի կատարում, արդեն 2 ամիս է` գոնե մեկ օր չեմ ապրել: Այդուհանդերձ վճարեցի չսպառված գազի դիմաց:

 

Հաջորդ օրը զանգահարեց մեր թաղամասը  սպասարկող հսկիչը: Անունը Լալա էր: Կինն ասաց, որ պետք է վճարեմ սպասարկման գումարը (դրա դիմաց իսկապես նախորդ օրը չվճարեցի):

 

Նրան հարցրի` ինչպես է հնարավոր չսպառած գազի դիմաց վերը նշված գումարը, եթե նշված տանը գոնե մեկ օր չեմ ապրել: Նա էլ թե՝ այդքան է եղել հաշվիչի ցուցմունքը: Ավելի զավեշտալին այն էր, որ տիկինը փորձում էր ապացուցել, որ հոկտեմբեր ամսին իմ տանը  միջոցառում է եղել, հենց այդ ժամանակ էլ սպառել ենք գազը: 

 

Միջոցառում իսկապես եղել է, սակայն սեպտեմբերի  28-ին, իսկ սեպտեմբեր ամսվա վճարումը վաղուց կատարել էի (1500 դրամ):

 

Այս խոսակցության հաջորդ օրը գնացի եւ ստուգեցի հաշվիչի ցուցմունքը: Նայեցի, բոլոր թվերը 0 էին: «Հայռուսգազարդ»-ի կայքից գտա ինչ-որ հեռախոսահամար: Բազմաթիվ զանգերից, երկար հարցուպատասխանից, ամեն զանգի հետ իրավիճակը նկարագրելուց հետո հեռախոսազանգին պատասխանեց մի կին, ով «միացրեց» Արաբկիրի հսկիչների պետի տեղակալին (Արսեն Մկրտչյան): 

 

Վերջինս  հայտնեց, որ պետք է կրկին դիմեմ տարածքային տեսուչին՝ Լալային, որ նրա հետ կուղարկի նաեւ ողջ տարվա ընթացքում սպառած գազի վճարումների մասին տվյալները:

 

Հանդիպեցի տիկին Լալային: 

 

Պարզվում է` հաշվիչները փոխել են: Տեսուչի խոսքերով՝ նախորդ հաշվիչում արձանագրված ցուցմունքի համաձայն՝ սպառել եմ մոտ 35 խմ:

 

-Ինչո՞ւ անձամբ ինձ չեք ասել գազի հաշվիչը փոխելիս:

 

-Ձեր հաշվիչը փոխելիս ներկա է եղել Ձեր հարեւանուհին…

 

-Հարեւանուհիս ասում է` տեղյակ չէ (մինչ այդ խոսել էի նրա հետ): 

 

Կարճ ասած՝ բաժանորդների հաշվիչները մեր թաղամասում փոխել են հոկտեմբերի 10-ին, այսինքն՝ նշված 4620 դրամի գազը, ըստ հսկիչի եւ ըստ նրա կողմից գրված ցուցմունքի,  սպառել եմ հոկտեմբերի 1-10-ն ընկած ժամանակահատվածում:

 

Որքանո՞վ են հավաստի հսկիչի գրած ցուցմունքի թվերը, կարո՞ղ եմ նախորդ հաշվիչը տեսնել ու ինքս ստուգել՝ արդյոք ճիշտ են դրանք, թե ոչ, չէ որ, ի վերջո, մարդկային գործոնը կա, եւ սխալվելու հավանականություն էլ կա, հսկիչի խոսքերով՝ չեմ կարող, քանի որ հաշվիչներն այսքան երկար չեն պահվում: 

 

Բացառում եմ  հաշվիչի փչացած լինելը, քանի որ մինչեւ փոխելը  ոչ մի անգամ խնդիր չի եղել, գազի արտահոսքն էլ է  բացառված է, քանի որ գազի միացման հիմնական կետերից անջատված է դեռ սեպտեմբերից, իսկ եթե այդուհանդերձ ընդունենք, որ գազի արտահոսք է եղել, ապա հաշվիչը փոխելուց հետո էլ պետք է դա լիներ, ինչն էլ կարձանագրվեր նաեւ հիմա:

 

-Ուրեմն գազը սպառել եք: Եթե ուզում եք, կարող եք բողոքել, դիմել դատարան…

 

Ստացվում է` ընկերությունն ինձնից չսպառած գազի դիմաց գանձել է 5000 դրամ, ու եթե հաշվի առնենք, որ վստահաբար միակ խաբված բաժանորդը չեմ, ուրեմն  ընկերությունը հաշվիչները փոխելիս կարող էր ամեն բաժանորդի չսպառած գազի դիմաց ինչ-որ թվեր գրել՝  շատ լավ հասկանալով, որ գործնականում բաժանորդը հետագայում չի կարող ապացուցել, որ ինքը չի սպառել գազը: 

 

Հաշվիչների ցուցմունքների հետ կապված դժգոհություններ ունեն նաեւ այլ բաժանորդներ, սակայն նրանցից շատերի խոսքերով՝ պարզապես շատ դեպքերում հետամուտ չեն լինում գործին մի քանի հազար դրամի համար: 

 

Ի դեպ, բաժանորդներից շատերը դժգոհում են նաեւ սպառած գազի կալորիականությունից:

 

Իրականում չգիտեմ՝ հնարավո՞ր էր հաշվիչները փոխելիս փոխել նաեւ հաշվիչի ցուցմունքը, բայց որ ինձ զգացի դասական թալանի զոհ, դա փաստ է: 

 

Հսկիչի հետ խոսելուց հետո կրկին զանգահարեցի «Հայռուսգազարդ», որտեղ դարձյալ ամենասկզբում զանգահարած համարը տվեցին: Այստեղ  պատասխանեց մեկը, ով նախ ասաց՝ տարածքային հսկիչին պետք է դիմեմ, ապա կրկին խոստացավ՝ կզանգեն:

 

Հ.Գ. Բոլոր զանգերը կատարել եմ ոչ թե իբրեւ լրագրող, այլ որպես քաղաքացի: Թերեւս դա է պատճառը, որ արդեն մոտ 2 շաբաթ է՝ հարցը կոնկրետ լուծում չի ստանում: