Այսօր` ժամը 13:30-ի սահմաններում, մետրոյի «Գարեգին Նժդեհ» կայարանի տարածքում հնչել են կրակոցներ: Ինչպես հայտնում է ֆոտոլրագրող Գագիկ Շամշյանը, այդ տարածքում գետնին ընկած է հրազեն, որի մոտ առկա են արյան հետքեր, ինչը նշանակում է, որ ինչ-որ մեկը հրազենային վնասվածքներով տեղափոխվել է հիվանդանոց:

Դեպքի վայրում հավաքվածները ֆոտոլրագրողին պատմել են, որ հնչել է մի քանի կրակոց: Ինչ-որ մեկը փորձել է ավազակային հարձակում կատարել, ոստիկանները հետապնդել են նրան, նա էլ մետրոյի մոտ՝ մարդաշատ վայրում, կրակել է ոստիկանների ուղղությամբ:

Իրավապահներից մեկը նախազգուշական կրակոց է արձակել օդ, որից հետո կրակել է նշյալ անձի վրա եւ վնասազերծել նրան: Վերջինիս տեղափոխել են հիվանդանոց:

Դեպքի վայր են ժամանել ոստիկանապետի առաջին տեղակալ Հունան Պողոսյանը, Երեւանի ոստիկանապետ Ներսես Նազարյանը, Ոստիկանության ԿՀԴՊ գլխավոր վարչության (6-րդ վարչություն) պետ Գագիկ Ավետիսյանը, Շենգավիթ վարչական շրջանի ոստիկանապետ Վահան Մամիկոնյանի տեղակալ Արթուր Օսիկյանը:

Քիչ առաջ ոստիկանության լրատվության վարչությունից տեղեկացրին, որ այսօր՝ ժամը  13:00-ի սահմաններում, անհայտ անձը, ներկայանալով ջրմուղի աշխատակից, փորձել է մուտք գործել Երևանի Եղբայրության փողոցի 16 շենքի բնակարաններից մեկը, սակայն տանտերը կասկածներ ունենալով՝ անմիջապես զանգել է ոստիկանություն:

Ոստիկանության ծառայողները շտապ մեկնել են ահազանգի հետքերով և հետապնդել ավազակային հարձակում կատարելու մեջ կասկածվող անձին: Վերջինս մետրոյի «Գարեգին Նժդեհ» կայարանի տարածքումչի ենթարկվել ոստիկանների օրինական պահանջներին, կիրառել է իր մոտ եղած զենքը, որից հետո ոստիկանության ծառայողները նախազգուշական կրակոց արձակելուց հետո վնասազերծել են հետապնդվողին, որը վնասվածքներով տեղափոխվել է «Էրեբունի» բժշկական կենտրոն:

«Պարզվել է, որ հետապնդվողը վերջերս մայրաքաղաքի մի շարք թաղամասերում ավազակային հարձակումներ կատարելու մեջ կասկածվող, 1981 թ. ծնված Արման Ենգիբարյանն է: Հանգամանքները պարզվում են, կատարվում է նախաքննություն»,- նշված է ոստիկանության տարածած հաղորդագրությունում:

Լուսանկարները՝ Գագիկ Շամշյանի