Տեսանյութեր
Լուսանկարներ
Դեկտեմբերի 10-ին նշվում է մարդու իրավունքների միջազգային օրը
Իրավապաշտպաններին գործազրկություն չի սպառնում
«Եվրոպական շատ երկրներում այս օրը չեն էլ հիշում, շարքային եվրոպացիները հաճախ նույնիսկ տեղյակ չեն, որ իրենց երկրում կա մարդու իրավունքների պաշտպան: Սակայն դա չի նշանակում, որ Եվրոպայում չեն խախտվում մարդու իրավունքները: Պարզապես դրանք, ի տարբերություն Հայաստանի, համակարգային բնույթ չեն կրում»,- այսօր՝ մարդու իրավունքների միջազգային օրվա առիթով ասուլիսի ժամանակ, հայտարարեց Հայաստանի հելսինկյան կոմիտեի նախագահ Ավետիք Իշխանյանը:
«Իրավապաշտպաններին գործազրկությունը չի սպառնում»,- հայտնի արտահայտությունը հիշեցրեց Ազգային ժողովի պատգամավոր, նախկին իրավապաշտպան Էդմոն Մարուքյանը՝ նշելով, որ Հայաստանում մարդու իրավունքների պաշտպանության հարցում հիմնական խնդիրներից են կալանքը որպես խափանման միջոց կիրառելը և պայմանական վաղաժամկետ ազատման համակարգի բացակայությունը:
ԱԺ ՀՀԿ-ական պատգամավոր Մարգարիտ Եսայանը նշեց, որ հասարակական կազմակերպությունները որոշ դեպքերում՝բանակին կապված խնդիրներ, կանաչ տարածքների պահպանում, լուրջ հաջողությունների են հասնում:
Ավետիք Իշխանյանն ասաց, որ վերջին տարիներին իրավապաշտպանները և քաղաքացիական հասարակությունը որոշ հաջողությունների են հասել և փոքր, տեղային հաղթանակներ տարել, սակայն դրանք հստակ դեպքեր են ու չեն ազդում ընդհանուր պատկերի վրա. խոշտանգման մեկ դեպք կանխելով կամ մեղավորներին պատժելով խոշտանգումների թիվը բնավ չի պակասում: Խնդրի լուծումը պետք է փնտրել ոչ թե հետևանքների, այլ պատճառների մեջ:
Ըստ Իշխանյանին՝ մարդու իրավունքները Հայաստանում պաշտպանված կլինեն այն ժամանակ, երբ դատական համակարգը գործի անկախ և տարանջատվի գործադիր իշխանությունից: «Եթե իմ իրավունքը խախտում է ոստիկանությունը կամ դատախազությունը, ես չեմ կարող վստահ լինել, որ դատական համակարգում պաշտպանություն կգտնեմ, քանի որ վերջինս ենթարկվում է գործադիր իշխանությանը, և այդպիսով շրջանը փակվում է»,- ասաց Իշխանյանը:
Խոսելով իրավունքների և պարտականությունների մասին՝ Ավետիք Իշխանյանը հիշեցրեց, որ ՀՀ շարքային քաղաքացիներն ունեն երկու պարտականություն՝ հարկեր վճարելու և բանակում ծառայելու: Մնացած ամեն ինչ իրենց իրավունքների շարքում է, իսկ ահա պետական պաշտոնյաններն ունեն ավելի շատ պարտականություններ, քան իրավունքներ:
Մեկնաբանել