Հանրապետական պատգամավոր Գագիկ Մինասյանը հայտարարել է, թե ընտրություններից հետո Սերժ Սարգսյանի խոստացած փոփոխությունները ցանկացած քաղաքացու համար կդառնան տեսանելի:

«ՉԻ» - Ստացվում է, որ այդ փոփոխությունները հիմա էլ կան, պարզապես տեսանելի չեն: Իսկ հիշո՞ւմ եք, թե ինչ էր խոստացել Սերժ Սարգսյանը 5 տարի առաջ: Օրինակ՝ խոստացել էր, որ 2012-ին (այսինքն՝ հիմա) աղքատության մակարդակը կլինի 14 տոկոս, բայց 35 տոկոս է: Խոստացել էր, որ 2012-ին նվազագույն աշխատավարձը կլինի 45,4 հազար դրամ, բայց 32,5 հազար է:

Փաստորեն, ըստ Գագիկ Մինասյանի, նվազագույն աշխատավարձը հիմա էլ է 45,4 հազար դրամ, բայց 13 հազարն անտեսանելի է. մարդիկ ստանում են ու չեն տեսնում: 

Ի դեպ, պատասխանելով այն հարցին, թե Սերժ Սարգսյանը նախընտրական խոստումներից ո՞րն է կատարել, Գագիկ Մինասյանն ասել է, թե իրենց հաջողվեց «առավել մեղմ ձեւով հաղթահարել համաշխարհային ֆինանսատնտեսական ճգնաժամը»: Ափսոս՝ 2008 թ. Սերժ Սարգսյանի նախընտրական ծրագրում այդպիսի կետ չկար: