Քաղաքական շրջանակներում, ինչպես նաև իրավապահ համակարգում շատերը գիտեն, որ ՀՀ ոստիկանապետ Ալիկ Սարգսյանը հաճախ է լինում հարևան Վրաստանի Հանրապետությունում: Նրա հաճախակի այցելությունների պատճառը ոչ միայն Վրաստանի մայրաքաղաք Թբիլիսիի հանդեպ ունեցած սերն է (վերջինս, ի դեպ, դրա մասին ասել է նաև լրագրողների հետ տարբեր շփումների ժամանակ), այլ նաև բիզնես հետաքրքրությունները:

«ՉԻ»-ին հասած տեղեկություններով` ՀՀ ոստիկանապետ Ալիկ Սարգսյանը Հայաստանից մետաղյա խողովակներ է արտահանում Վրաստան: Խողովակներն արտադրվում են Հայաստանում, և դրանք, ասում են, մեծ պահանջարկ ունեն Վրաստանում: Բայց սա Ալիկ Սարգսյանի միակ բիզնես նախագիծը չէ Վրաստանի տարածքում:

Որոշ ժամանակ առաջ Վրաստանում գործող բուքմեյքերական գրասենյակները փակվեցին: Վրաստանի նախագահ Սահակաշվիլին ինքն էր արգելել այդ գրասենյակների տարածումը: Որոշ ժամանակ անց հայերից բաղկացած ճարպիկների մի խմբի հաջողվեց բուքմեյքերական գրասենյակներ բացել հենց Թբիլիսիի կենտրոնում: Սահակաշվիլին անձամբ էր թույլատրել հայերին բացել այդ «կանտորաները» այն բանից հետո, երբ հայկական կողմից ազդեցիկ մարդիկ խառնվեցին:

Խոսակցություններ կան, որ Ալիկ Սարգսյանն է Վրաստանում բուքմեյքերական գրասենյակների իրական սեփականատերը, և նրա հովանավորությամբ ինչ-որ մարդիկ աշխատեցնում են դրանք: Համենայնդեպս, վրացական հարկային մարմինների ներկայացուցիչներին այդ մասին զգուշացված է, և նրանցից առավել բարձրաստիճանները երբեմն հյուրընկալում և ընկերակցում են Ալիկ Սերգեյիչին` իր վրացական «հյուրախաղի» շրջանակներում: