ԲՀԿ խմբակցության պատգամավոր Նաիրա Զոհրաբյանը էթիկայի հանձնաժողովում իշխանական պատգամավորների թվի ավելացումը անընդունելի համարեց: Նա նշեց, որ նախագծի իրական պատասխանատուն Դավիթ Հարությունյանն է, եւ նա էլ պետք է ներկայացներ նախագիծը:

Հիշեցնենք, որ Ազգային ժողովում քննարկվում է ՀՀԿ-ական պատգամավորներ Դավիթ Հարությունյանի ու Արփինե Հովհաննիսյանի օրենսդրական նախաձեռնությունը` «Ազգային ժողովի կանոնակարգ» օրենքում լրացումներ եւ փոփոխություններ կատարելու մասին, որը վերաբերում է էթիկայի հնձնաժողովին: Պատգամավորները նախատեսում են էթիկայի հանձնաժողովում ավելացնել իշխանական եւ ընդդիմադիր պատգամավորների թիվը եւ հավասարակշռություն պահել:

Նաիրա Զոհրաբյանը կոչ արեց զեկուցող կին պատգամավորների նկատմամբ կոռեկտ լինել, այնուհետեւ տվեց մի քանի քաղաքական գնահատականներ: «Այստեղ լրջագույն փորձեր են արվում, ճշգրտումներ են գնում` ճշտելու ԲՀԿ-ի դերը արեւի տակ»,-ավելացրեց Ն. Զոհրաբյանը: Նա քաղաքական ուժերին խոհուրդ տվեց զբաղվել իրենց լրջագույն խնդիրներով, որոնք բազմաթիվ են եւ ԲՀԿ-ին հանգիստ թողնել:

Նաիրա Զոհրաբյանն ասաց, որ իր տպավորությամբ այս նախագծով էթիկայի հանձնաժողովը «անսահման հոգատարություն» է ցուցաբերում ԲՀԿ-ի նկատմամբ, ինչի կարիքն ամենեւին չկա:

«Մենք հրաշալի գիտենք մեր տեղն ու դերը: ԲՀԿ-ն միանշանակ դեմ է այս նախաձեռնությանը, քանի որ էթիկայի հանձնաժողովը վերածվելու է մինի ԱԺ-ի, որտեղ անցնելու է մեծամասնության խոսքը»,-ավելացրեց Նաիրա Զոհրաբյանը: