Արծվիկ Մինասյան. «Հերիք եղավ, սա էլ ձեր մեծամասնական կոճակները չեն, սա ամբիոն է»
Ընդդիմադիր պատգամավորները հերթով քննադատում են ՀՀԿ-ական պատգամավորներ Արփինե Հովհաննիսյանի եւ Դավիթ Հարությունյանի օրենսդրական նախաձեռնությունը, որով հավասարեցվելու է իշխանական եւ ընդդիմադիր պատգամավորների թիվը ԱԺ էթիկայի հանձնաժողովում:
Հիշեցնենք, որ էթիկայի հանձնաժողովում լարվածություն առաջացավ հատկապես ընդդիմության նախաձեռնած նոյեմբերի 21-ի արտահերթ նիստից հետո, երբ ՀՀԿ-ն ու ՕԵԿ-ը դահլիճ չեկան ու չգրանցվեցին` այդպիսով տապալելով նիստը, իսկ ՀՅԴ խմբակցության պատգամավորները դիմեցին էթիկայի հանձնաժողով` քննարկելու քաղաքական մեծամասնության պահվածքը: Էթիկայի հանձնաժողովի նիստում հանձնաժողովի փոխնախագահ Դավիթ Հարությունյանը անհամաձայնություն է ունեցել եւ լքել է հանձնաժողովի նիստը:
«Դավիթ Հարությունյանը սաբոտաժի է ենթարկել այս դիմումի քննարկումը: Այն, ինչ արեց պարոն Հարությունյանը էթիկայի հանձնաժողովում, էթիկայի հանձնաժողովում առանձին քննարկման հարց է: Նա իր պահվածքով հեղինակազրկում է ոչ միայն հանձնաժողովը, այլեւ խորհրդարանը»,-հայտարարեց ՀՅԴ խմբակցության պատգամավոր Արծվիկ Մինասյանը:
Պատգամավորը նշեց, որ քաղաքական մեծամասնությունը ոչ մի աղերս չունի ժողովրդավարության հետ: Դահլիճից ՀՀԿ-ական պատգամավորները ռեպլիկներ բաց թողեցին ընդդիմադիր պատգամավորի հայտարարության վերաբերյալ, ինչը բարկացրեց Ա. Մինասյանին: «Հերիք եղավ, սա էլ ձեր մեծամասնական կոճակները չեն, սա ամբիոն է»,-հայտարարեց Արծվիկ Մինասյանը:
Նա կոչ արեց օրակարգից հանել այս նախագիծը: «Այն, ինչ փորձում եք անել, հակաժողովրդական է: Այն, ինչ փորձում եք անել, շուռ է գալու ձեր դեմ եւ չի բխում Սահմանադրության նորմերից»,-ասաց Արծվիկ Մինասյանը:
Ակնհայտ է, որ այսօր Հովիկ Աբրահամյանը անհանդուրժող է ընդդիմադիրների նկատմամբ: Նա այս անգամ էլ Արծվիկ Մինասյանի հետ փորձեց լեզվակռիվ տալ: «Պարոն Մինասյան, ես չգիտեմ, թե ինչ է կատարվում ձեզ հետ, բայց հաստատ ինչ-որ բան կատարվում է»,-ավելացրեց Հովիկ Աբրահամյանը:
Մեկնաբանություններ (1)
Մեկնաբանել