Դեկտեմբերի 15-ին ոստիկանության Երևան քաղաքի վարչության հերթապահ մասից ոստիկանության Սիսիանի բաժնում ահազանգ է ստացվել, որ իրենց է զանգահարել Սյունիքի մարզի Թասիկ գյուղի մի բնակիչ և հայտնել, որ գիշերն իր անասնագոմից գողություն է կատարվել:

Մեկնած օպերատիվ խումբը պարզել է, որ գիշերը, կոտրելով նշված անասնագոմի դուռը, գողացել են 2 ոչխար, 1 գառ և 1 խոզ՝ պատճառելով 200.000 դրամի նյութական վնաս:

Ոստիկանության Սյունիքի մարզային վարչության և Սիսիանի բաժնի ծառայողների ձեռնարկած օպերատիվ-հետախուզական միջոցառումների շնորհիվ պարզվել է, որ գողությունը կատարել են 1988 թ. ծնված Միքայել Մ.-ն և 1984 թ. ծնված Հայկ Խ.-ն:

Միքայել Մ.-ն ձերբակալված է: Ձեռնարկվում են միջոցառումներ Հայկ Խ.-ին հայտնաբերելու ուղղությամբ:

«Գողոնը հայտնաբերված է: Կատարվում է նախաքննություն»,- հայտնում է ոստիկանությունը: