ՀՀ էկոնոմիկայի նախարարությունը, ՀՀ Ազգային վիճակագրական ծառայությունը, Հայաստանի Ազգային մրցունակության հիմնադրամը, ԱՄՆ ՄԶԳ Ձեռնարկությունների զարգացման և շուկայի մրցունակության («Ի-Դի-Էմ-Սի») ծրագիրը և Գերմանիայի միջազգային համագործակցության ընկերակցության (GIZ) Հարավային Կովկասում մասնավոր հատվածի զարգացման ծրագիրը այսօր ստորագրեցին հուշագիր` ազդարարելով Հայաստանում զբոսաշրջության վիճակագրական հետազոտության մեկնարկը:

Հետազոտությունն իրականացվելու է 2013թ. հունվարի 1-ից մինչև դեկտեմբերի 31-ը Հայաստանի Բագրատաշենի, Մեղրիի, Այրումի և Բավրայի սահմանային անցակետերում, ինչպես նաև Երևանի «Զվարթնոց» միջազգային օդանավակայանի և Շիրակ օդանավակայանի անցակետերում:

Հետազոտության նպատակն է իրականացնել հանրապետություն ժամանողների և հանրապետությունից մեկնողների շրջանում զբոսաշրջիկների վերաբերյալ հնարավորինս հավաստի տվյալների հավաքագրում, որոնք կբնորոշեն զբոսաշրջիկների աշխարհագրական բաշխվածությունը, ժամանման և մեկնման նպատակը, ճամփորդության կազմակերպման եղանակները, կատարված ծախսերը և զբոսաշրջիկների սեռատարիքային կազմը:

Վերջնական զեկույցը նորացված տվյալներ կներկայացնի շուկայի հիմնական հատվածների վերաբերյալ, կհեշտացնի զբոսաշրջության զարգացման ազգային ռազամավարության վերանայումը և կխթանի զբոսաշրջության նոր փաթեթների մշակումը: Զեկույցը նաև կօգնի որոշել զբոսաշրջության ոլորտի զարգացման ուղղությամբ կատարվելիք հետագա քայլերը և զբոսաշրջության ոլորտում վաճառքը, եկամուտները և հասույթը ավելացնելու հնարավորությունները:

Հավաքագրված տվյալները կօգտագործվեն զբոսաշրջությանը վերաբերող տնտեսական ցուցանիշները հաշվելու և Հայաստանում զբոսաշրջային սատելիտային հաշիվ (Tourism Satellite Account) համակարգ ներդրելու համար: Վերջինս գնահատում է ոլորտի ապրանքներն ու ծառայություններն ըստ միջազգային դասակարգումներ՝ հնարավորություն տալով այլ երկրների հետ հավաստի համեմատություններ կատարել:

ԱՄՆ ՄԶԳ-ն իր «Ի-Դի-Էմ-Սի» ծրագրի միջոցով այս նախաձեռնության գլխավոր աջակիցն է: «Ի-Դի-Էմ-Սի»-ն 2012թ. ամռանը աջակցել է հետազոտության մեթոդոլոգիայի մշակմանը և ֆինանսավորելու է այս ծրագրի աշխատակազմի համալրման, իրականացման, տվյալների վերլուծության և զեկույցի հրապարակման փուլերը: Հետազոտության արդյունքները շահառուներին հնարավորություն կընձեռեն արձանագրել ոլորտում բարելավումները և որոշել այն բնագավառները, որտեղ Հայաստանի զբոսաշրջությունը հետագա աջակցության կարիք ունի:

Վերջնական զեկույցը կհրապարակվի 2014թ.: