Դեռ աշնանը Գեղարքունիքի մարզի Վարդենիսի տարածաշրջանի գյուղացիները դժգոհում էին, որ այս տարի խոտը քիչ է ու թանկ, այդ իսկ պատճառով հնարավոր է՝ կրճատեն իրենց անասունների գլխաքանակը, քանի որ անասուն պահելն արդեն թանկ հաճույք է: ԴԺգոհությունը մեծ էր հատկապես Կախակն, Ակունք, Գեղամաբակ համայնքներում:

Գեղարքունիքի մարզպետարանի գյուղատնտեսության և բնապահպանության վարչության պետ Վանիկ Հովհաննիսյանը «Հետքի» հետ զրույցում ասաց, որ մարզը ծավալային խոտի խնդիր ընդհանրապես չունի:

«Խոտի գինը, բնականաբար, պիտի բարձրանա, որովհետև ավտոմեքենաների յուղերը, պահեստամասերը, տեղափոխությունը, ամեն ինչը թանկացել է. ո՞նց կարող է խոտի գինը չբարձրանալ: Բացի դրանից՝ խոտը շատ թանկ չի, ո՞վ է ասում, որ թանկ է: Խոտի մեկ տուկի միջին գինը 1200 դրամ է»,- ասաց վարչության պետը:

Վանիկ Հովհաննիսյանի խոսքով՝ մարզում անասունների գլխաքանակն այնքան մեծ է, որ նույնիսկ տոնական օրերին մսի գինը չի բարձրանում, ընդհակառակը, այս օրերին տավարի մսի 1կգ-ի գինը տատանվում է 2000-2100 դրամի միջև: