ՀՀ տարածքային կառավարման նախարարին կից կոլեգիայի  այսօրվա նիստում, որը վարում էր փոխվարչապետ, տարածքային կառավարման նախարար Արմեն Գեւորգյանը,  քննարկվեցին Տարածքային զարգացման հիմնադրամի ձեւավորման մոտեցումների վերաբերյալ լրամշակված առաջարկությունները:

ՏԿՆ աշխատակազմի տարածքային զարգացման վարչության պետ Հայկ Գալստյանը ներկայացրեց հիմնադրամի նպատակների, գործառույթների, կառավարման մեխանիզմների,  հիմնադրամի միջոցների ձեւավորման աղբյուրների վերաբերյալ հիմնական մոտեցումները: Փաստաթուղթը մշակելիս հաշվի է առնվել նմանատիպ հիմնադրամների ստեղծման այլ երկրների եւ, մասնավորապես, Վրաստանի փորձը:

Հիմնադրամի հիմնական նպատակներն են մարզերում իրականացվող կապիտալ ներդրումների ազդեցության մեծացումը` հաշվի առնելով տվյալ տարածաշրջանի համաչափ զարգացման եւ աղքատության կրճատման մակարդակը, տարբեր ֆինանսական կազմակերպությունների եւ դոնորների միջոցներով ծրագրերի համակարգված իրականացումը, ինչը հնարավորություն կտա բարձրացնել աշխատանքների արդյունավետությունը:

Հիմնադրամը կունենա հիմնական չորս գործառույթ` համայնքների  ֆինանսական եւ ինստիտուցիոնալ կարողությունների ամրապնդում, պետություն- մասնավոր հատված համագործակցության արդյունքում սոցիալ-տնտեսական զարգացման ծրագրերի իրականացում եւ մասնավոր հատվածի կողմից իրականացվող ծրագրերին աջակցության ցուցաբերում, միջհամայնքային համագործակցության խրախուսում, ուղղակի կապիտալ ծրագրերի իրականացում:

Փաստաթուղթը կներկայացվի կառավարություն, սակայն փոխվարչապետը նշեց, որ այն լայն քննարկման առարկա է լինելու եւ կոչ արեց կոլեգիայի անդամներին եւս ներկայացնել իրենց առաջարկություններն ու կարծիքները:  

Կոլեգիան ի գիտություն ընդունեց ՏԻՄ-երի տեղեկատվայնացման ուղղությամբ 2012 թվականին կատարված աշխատանքների արդյունքների մասին տեղեկատվությունը: Տարվա ընթացքում  ՏԻՄ-երի տեղեկատվայնացման առումով իրականացված հիմնական աշխատանքներն ուղղված են եղել քաղաքային եւ խոշոր գյուղական համայնքներում Համայնքային կառավարման տեղեկատվական համակարգերի (ՀԿՏՀ) ներդրմանը եւ «Mulberry» համակարգի միջեւ փոխգործակցության հաստատմանը: Պետական կառավարման մարմիններում շահագործվող փաստաթղթաշարժի «Mulberry» համակարգը ներդրվել է 115 համայնքապետարաններում (37 քաղաքային եւ 78 գյուղական): 2012 թ.-ին ՀԿՏՀ է ներդրվել 98 համայնքում: Ներկայումս  համակարգը տեղադրված է ընդհանուր առմամբ 339 համայնքում:  Փոխվարչապետը հանձնարարեց գալիք տարվա ընթացքում նույնպես  շարունակել աշխատանքները:

 ՏԿՆ ջրային տնտեսության պետական կոմիտեի նախագահ Անդրանիկ Անդրեասյանը նախնական տեղեկատվություն ներկայացրեց 2012 թ. ընթացքում մատակարարված ոռոգման ջրի ծավալների, հասույթի, գանձման ցուցանիշների վերաբերյալ: Եղանակով պայմանավորված` այս տարի ոռոգման շրջանն ավելի վաղ էր մեկնարկել, եւ նախորդ տարվա համեմատ ձեւավորվել է  շուրջ 700 մլն դրամով ավելի հասույթ`  կազմելով  5 մլրդ 253 մլն  դրամ: Ա. Անդրեասյանը տեղեկացրեց, որ գանձումների ուղղությամբ աշխատանքները շարունակվում են, եւ վերջին տարիներին հավաքագրման միջին ցուցանիշը կպահպանվի:

Փոխվարչապետը եւս անդրադարձավ  ոռոգման  համակարգում այս տարի արձանագրված  դժվարություններին`  նշելով, որ գալիք տարիներին  կառավարության ուշադրության կենտրոնում են լինելու ջրամաբարաշինության եւ ջրակուտակման նոր հնարավորությունների ստեղծման խնդիրները:

ՏԿՆ հասարակայնության հետ կապերի բաժին