Կենտրոնական ընտրական հանձնաժողովն այսօր արտաքին գործերի նախարարության ներկայացուցչին է փոխանցել 2013թ. փետրվարի 18-ի ՀՀ նախագահի ընտրություններին էլեկտրոնային եղանակով քվեարկող ՀՀ դիվանագիտական և հյուպատոսական ներկայացուցչություններում դիվանագիտական ծառայություն անցնող ընտրողների և նրանց հետ արտերկրում բնակվող ընտանիքի` ընտրելու իրավունք ունեցող անդամների թվին համապատասխան անհատական ծածկագրեր պարունակող ծրարներ:

ԿԸՀ նախագահ Տիգրան Մուկուչյանը տեղեկացրել է, որ 35 երկրներում դիվանագիտական ծառայություն անցնող ընտրողների և նրանց հետ արտերկրում բնակվող ընտանիքի` ընտրելու իրավունք ունեցող անդամների ընդհանուր թիվը 243 է:

Տիգրան Մուկուչյանը ներկայացրել է նաև ԿԸՀ կողմից հրապարակված ուղեցույցը` էլեկտրոնային քվեարկության իրականացման կարգի եվ ժամկետների վերաբերյալ:

Ուղեցույցը, ինչպես նաև Էլեկտրոնային եղանակով քվեարկող ընտրողների ցուցակը զետեղված են Կենտրոնական ընտրական հանձնաժողովի կայքէջում:

ԿԸՀ մամուլի ծառայություն