Վրաստանի Հանրապետությանը սահմանակից Լոռու մարզի Ճոճկան գյուղում Հայաստանում աճող բոլոր պտղատեսակներից բացի պտղաբերում են նաեւ նուռը, թուզը, խուրման: Ճոճկանցիներն ավանդաբար զբաղվել են այգեգործությամբ, սակայն անկախության տարիներին գյուղի ոռոգման ջրատարների եւ քայքայված ներքին ցանցի անուշադրության պատճառով կորցրել են մոտ 1000 հա այգի:

«Մեր ջուրը քիչ ա, էլի: Երկու հատ աղպիր ունենք, նրանով ենք ապահովում, հետն էլ շատից-քչից անտառից ունենք ջուր՝ նհե օգտագործելու: Խմելու ջրի խնդիրը լավը չի, չէ»,- հայտնեց գյուղի տարեց տղամարդկանիցից մեկը՝ Լեւոն Հախվերդյանը:

Զրուցակիցս, կանխելով ոռոգման ջրի մասին հարցս, հավելեց. «Ոռոգման ջրի մասին չասես, էդ մի բանն էլ չկա: Գյուղի կարեւոր խնդիրը ոռոգման ջուրն է»:

Լեւոն Հախվերդյանն ասաց, որ 1 հա հող ունի, որտեղ կամ ցորեն է ցանում, կամ արեւածաղիկ, բայց բերք չի հավաքում: Հետո դեմքի դժգոհ արտահայտությունը փոխվեց, միանգամից պայծառացավ ու ավելացրեց. «Երկու թոռներս Ղարաբաղում ծառայում են, Լեռնո Հախվերդյան թոռս, որ գնացել ա բանակ, գովասանագիր ա ստացել: Էն մին թոռս էլ ինձ նման Լեւոն Հախվերդյան է, նա էլ է գովասանագիր ստացել»:

Կենսախինդ ճոճկանեցին լավատես մարդ էր եւ սպասում էր ոռոգման ջրի խնդրի լուծմանը:

«Գյուղապետը փոխվել ա, տենանք հլա ջուրը որդիան տի ստեղծիլ: Մեր գյուղի հիմնական պրոբլեմը խմելու եւ ոռոգման ջուրն ա, էտա, հա»,- ասաց նա: Թեեւ ջրի պակասությանը, ճոճկանցիները մոտ 30-40 հա նորատունկ այգիներ  են հիմնել. «Կառալյոկ են տնկում, ես ինչ գիտեմ, խնձոր  են տնկում, դեղձ են տնկում: Շատը օգտվում էլ են: Փողը տալիս են «Այրում-Ճոճկան» նասոսին: Էտա, էլ ուրիշ նհե հնար չկա: Հա, էլի դժվար ենք ապրում»,- ասաց Լեւոն Հախվերդյանը:

Ըստ ճոճկանեցի Մարինե Ասլանյանի՝ 504 տնտեսություն եւ մոտ 2000 բնակիչ ունեցող գյուղից շատերն են հեռացել. «Մեր գյուղացիներից շատը դրսում են աշխատում»,- ասաց  նա:  Մարինեն նշեց, որ վերջին տարիներին Ճոճկանում որոշակի խնդիրներ լուծվել են. մանկապարտեզը գործում է, որոշ փողոցներ լուսավորված են, գյուղի գլխավոր փողոցն ասֆալտապատվել է:

Ճոճկանի 2008-2012 թթ. քառամյա ծրագրով առաջնահերթ խնդիր է դիտվել գյուղի խմելու ջրի ներքին ցանցի կառուցումը: Ճոճկանում երբեք չի եղել եւ չկա խմելու ջրի ներքին ցանց: Երկու հազար բնակիչ ունեցող գյուղին սպասարկել են բնական երկու աղբյուրները, որոնք չեն բավականացնում գյուղացիներին: Աղբյուրների ջրերն ունեն կոշտ եւ կրային նստվածքներ: Ջրերը խմելու համար ոչ պիտանի են համարվում:

«Գյուղի աղբյուրների ջրերն օգտագործելու պատճառով ճոճկանցիների մոտ տարածված են լնդային եւ երիկամային հիվանդությունները»,- արձանագրված է Ճոճկանի 2008-2012 թթ. քառամյա ծրագրում:

Խմելու ջրի ներքին ցանցի համար անհրաժեշտ է եղել կառուցել 4 կմ երկաթյա խողովակացանց, որի ֆինանսական արժեքը ծրագրով գնահատվել է 12 մլն դրամ: Նորընտիր համայնքապետ Արկադի Թամազյանն ասաց, որ դեռեւս ծանոթ չէ Ճոճկանի խմելու ջրի ներքին ցանցի կառուցման խնդիրներին:

Նախկին համայնքապետ Սամվել Գիգոլյանը տեղեկացրեց, որ 2011թ. «Հազարամյակի մարտահրավերներ»-ի ծրագրով 3 կմ ջրագիծ է վերակառուցվել: «Սնունդ աշխատանքի դիմաց» ծրագրով վերանորոգվել են որոշ ջրագծեր: «Վորլդ Վիժն» կազմակերպության աջակցությամբ գյուղի դաշտերում փոխվել են որոշ ջրագծեր, մնում է դրանք ծածկել: Այդուհանդերձ, նախկին համայնքապետը նշեց, որ իրեն վերջնականապես չի հաջողվել լուծել գյուղի խմելու ջրի ներքին ցանցի կառուցման խնդիրը:

Սամվել Գիգոլյանն իր հեղինակած քառամյա ծրագրում նախատեսել է նաեւ Ճոճկանի ոռոգման ներքին ցանցի նորոգումը: Գյուղի ջրովի հողատարածքների միջով անցնող շուրջ 7 կմ երկարությամբ մայր առուն 70-ական թվականներից նորոգված չէ, որի պատճառով պոմպակայաններից մղվող ջրի ընդամենը 30 %-ն է հասնում ջրովի հողերին:

Ծրագրի արժեքը կազմել 75 մլն դրամ, որը նախկին համայնքապետին չի հաջողվել հայթայթել: Քառամյա ծրագրով նախատեսված Ճոճկանի զարգացմանը խիստ անհրաժեշտ ոռոգման ներքին ցանցի նորոգման խնդիրը նույնպես մնացել է անլուծելի: Անլուծելի է մնացել նաեւ Ճոճկանի 7 կմ երկարությամբ ներհամայնքային ճանապարհի բարեկարգման խնդիրը: 

Այսօր Ճոճկանի նորընտիր համայնքապետ Արկադի Թամազյանը հայտնեց, որ Ճոճկանի համայնքապետի պարտականություններն ստանձնելուց 10 օր հետո հրավիրել է համայնքային ժողով եւ գյուղացիների հետ քննարկել գյուղի առաջնահերթ լուծում պահանջող խնդիրները: 

«Բարձրացված կարեւորագույն հարցերը տեղ կգտնեն Ճոճկանի 2013-2016թթ. քառամյա ծրագրում»,- ասաց նա: Թե որոնք են առաջնահերթները, Արկադի Թամազյանն ասաց, որ այդ մասին կհայտնի քառամյա ծրագիրն ավագանու նիստում քննարկելուց հետո: