ԱԺ պատգամավոր Հակոբ Հակոբյանի գործով այսօր դատարանում հարցաքննված վկա Մուշեղ Անտոնյանի ասածները էականորեն տարբերվում են նախաքննության ժամանակ` անցյալ տարվա մայիսի 5-ին, Հատուկ քննչական ծառայության քննիչ Գեւորգ Գեւորգյանին տված ցուցմունքից: Վկան պնդում է, որ իր նկատմամբ երբեւէ հարկադրանք չի եղել. ցուցմունքը տվել է կամովին: Իսկ թե ինչո՞վ է պայմանավորված ցուցմունքների հակասությունը, նա կոնկրետ բացատրություն չուներ:

«Ես քննիչի մոտ ոչ մի ցուցմունք չեմ գրել, իմ տեղը գրել են, ես տակը ստորագրել եմ: Իմ սխալն էն ա, որ առանց կարդալու ստորագրել եմ»,- ասաց Մ. Անտոնյանը:

Վերջինս դատարանում հարցաքննության սկզբում հայտարարում էր, որ չի կարող նախաքննությանը տված ցուցմունքը պնդել կամ ժխտել, քանի որ դրանից տեղյակ չէ: Իսկ նախաքննական մարմնին նա հայտնել է, որ 2008 թ. նախագահական ընտրություններից` փետրվարի 19-ից հետո երկու անգամ մասնակցել է Ազատության հրապարակում ընդդիմության կազմակերպած հանրահավաքին: Ընդ որում` երկրորդ անգամ հանրահավաքի է գնացել Հակոբ Հակոբյանի հորեղբոր տղայի` Սեյրանի հետ, քանի որ դրանից մի քանի օր առաջ Հ. Հակոբյանն իրեն «մունաթով» հարցրել է, թե ինչո՞ւ հանրահավաքներին չի մասնակցում, եւ ինքը միտինգի է գնացել զուտ Հակոբյանի աչքին երեւալու եւ «ներկա ստանալու» համար:

«Քանի որ Հ. Հակոբյանի հարցի մեջ սպառնալիք զգացի եւ նրա տոնից հասկացա, որ եթե հանրահավաքներին չմասնակցեմ, ինձ աշխատանքից կազատի»,- բացատրել էր վկա Անտոնյանը: Այնուհետեւ նա պատմել էր, որ աշխատում է Մալաթիայի տոնավաճառում` «Ռաֆայել-Տաթեւ» ՍՊԸ-ում, եւ դրանից մոտ երկու տարի առաջ վիճաբանել է Հակոբ Հակոբյանի ընկերոջ` Հարութի հետ, ինչի պատճառով Հ. Հակոբյանը փակել էր իր խորովածանոցը:

«Մի կերպ ներողություն խնդրելուց եւ Հ. Հակոբյանի մոտ գնալուց հետո նա բացեց խորոված-քյաբաբի վաճառքի իմ կետը»,- քննիչին ասել է Մուշեղ Անտոնյանը:

Նա թվարկել է կոնկրետ մարդկանց անուններ, որոնց շրջապատում էլ երկու անգամ հանրահավաքի ժամանակ տեսել է Հակոբ Հակոբյանին: Իսկ մարտի 1-ին թե՛ նախաքննական, թե՛ այսօր դատարանում տված ցուցմունքով վկա Անտոնյանը հանրահավաքին չի մասնակցել. եղել է տանը եւ կատարվածի մասին տեղեկացել է հեռուստացույցից:

Այսօր դատարանում Մուշեղ Անտոնյանը նշեց, թե այս ցուցմունքներն իրականությանը չեն համապատասխանում, ինքը փետրվարի 19-ից հետո ընդամենը մեկ անգամ է մասնակցել ընդդիմության հանրահավաքին, գնացել է կամովին` հետաքրքրությունից դրդված, ճիշտ այնպես, ինչպես մյուս ուժերի հանրահավաքներին, սակայն Օպերայի մոտ եղել է ընդամենը 20 րոպե, քանի որ «հետաքրքիր ոչ մի բան չկար»:

Հակոբ Հակոբյանին տեսնելու, նրանից հանրահավաքներին մասնակցել-չմասնակցելու կապակցությամբ հորդոր կամ սպառնալիք լսելու հանգամանքը հերքելուց բացի, վկան շեշտեց, որ «Ռաֆայել-Տաթեւ» ՍՊԸ-ի տնօրենը Սամվել Ավետիսյանն է, վերջինս է իրեն ընդունել աշխատանքի, եւ Հ. Հակոբյանը նույնիսկ ցանկության դեպքում չէր կարող իրեն աշխատանքից ազատել:

Վկա Մուշեղ Անտոնյանին հարցաքննելուց հետո դատարանն անցավ գործում եղած մյուս ապացույցների հետազոտմանը: Մեղադրող Հովսեփ Սարգսյանի միջնորդությամբ` դատարանը կասեցրեց դատակոչված և չհարցաքննված վերջին վկային` Աշոտ Մելքոնյանին բերման ենթարկելու մասին որոշումը: