Ռուբեն Այվազյանը ընտրագրավի հարցը լուծել էր, սակայն չվճարեց ու դուրս մնաց ընտրապայքարից. ինչո՞ւ
Մարդու իրավունքների եվրոպական դատարանում փաստաբան, ԲՀԿ անդամ Ռուբեն Այվազյանն առաջադրվել էր փետրվարի 18-ին կայանալիք նախագահի ընտրությանը որպես թեկնածու, սակայն 8 մլն դրամ ընտրագրավը չվճարելու համար այսօր նա դուրս մնաց ընտրապայքարից:
«Պատրաստվում էի դիմել դատարան ՀՀ նախագահական ընտրությունները 54 օրով հետաձգելու համար, սակայն հետագայում իմ կուսակից ընկերների հետ զրուցելուց հետո որոշեցի չշարունակել ընտրապայքարը: Ասեմ, որ լրատվամիջոցները նկարահանումներ են կատարել իմ նախընտրական շտաբում, որտեղ տեղի էր ունենում շտաբի բարեկարգման եւ կահավորման աշխատանքներ, ինչը եւս մեկ անգամ ապացուցում է, որ գումարային խնդիրները լուծվել էին»,-«Հետքի» հետ զրույցում ասաց Ռուբեն Այվազյանը:
Հարցին, թե ինչը ստիպեց իրեն, որ, այնուամենայնիվ մտածի ՀՀ նախագահ դառնալու մասին, Ռուբեն Այվազյանը պատասխանեց. «ՄԻԵԴ-ում գործեր նախապատրաստելու ժամանակ նկատեցի, որ Հայաստանը թալանվել է օրենքի ուժով, եւ այդ ամենը կարելի է վերադարձնել նոր օրենքներ ընդունելով: 2 տարվա ընթացքում նախապատրաստել եմ տարբեր օրենքների նախագծեր, ինչի համաձայն ես կկարողանայի Հայաստանը դուրս բերել այս ծանր սոցիալ-տնտեսական վիճակից»:
Ռուբեն Այվազյանի խոսքերով՝ նախագահի թեկնածուները որեւէ նոր ծրագիր չեն ներկայացելու, ինչը լավ բան չի խոստանում Հայաստանի համար: «Թեկնածուներից մեկը ծրագիր ներկայացնելու փոխարեն զբաղված է կարգախոսեր ընտրելով: Իսկ մնացածը որեւէ նոր բան չեն ասում: Իմ կարծիքով, եթե կոռուպցիայի դեմ պայքարի իմ ծրագիրը կյանքի չկոչվի, որեւէ առաջընթաց ու բարեփոխումներ երկրում չի լինելու»,-ավելացրեց Ռ. Այվազյանը:
Լուս.՝ Ռ. Այվազյանի ֆեյսբուքյան էջից
Մեկնաբանել