2012 թվականի դեկտեմբերի 25-31-ն ընկած ժամանակահատվածում Վրաստան է այցելել Հայաստանի 27 հազար 609 քաղաքացի: Այս ցուցանիշով հայաստանցիները Վրաստան այցելած օտարերկրյա պետությունների քաղաքացիների թվով երկրորդ տեղում են:

Երեկ նման տվյալներ է հրապարակել Վրաստանի ներքին գործերի նախարարությունը: Նշված ժամանակահատվածում Վրաստան այցելած օտարերկրացիների թվով առաջինը Թուրքիայի քաղաքացիներն են` 29 հազար 485 հոգի:

Երրորդ տեղում Ադրբեջանի քաղաքացիներն են` 21 հազար 874 մարդ: Սակայն, եթե համեմատենք Վրաստան այցելած զբոսաշրջիկների թիվը իրենց երկրների բնակչության հետ, ապա կստացվի, որ Վրաստան այցելած օտարերկրացիների թվով բացարձակ առաջատարը հայաստանցիներն են:

Գաղտնիք չէ, որ Հայաստանի քաղաքացիներին հարևան երկիրը, հատկապես գրավում է զբոսաշրջության վայրերի և մատուցվող ծառայությունների անհամեմատ ցածր գնով: Այդ իսկ պատճառով շատ հայաստանցիներ նախընտրում են հանգիստն անցկացնել Վրաստանում: Դա հատկապես նկատելի է ամառային սեզոնին: