Հինգշաբթի օրը ՀՀ կառավարությունը բացասական եզրակացություն տվեց «Ժառանգություն» պատգամավորական խմբակցության ներկայացրած օրինագծին, որը ենթադրում էր քրեականացնել Ազգային ժողովում մի պատգամավորի կողմից այլ պատգամավորի փոխարեն քվեարկելը:

Մասնավորապես, «Ժառանգությունը» առաջարկում էր փոփոխել «Ազգային ժողովի կանոնակարգ» օրենքն այնպես, որ այլ պատգամավորի փոխարեն քվեարկության (կամ գրանցման) դեպքում ԱԺ նախագահը հանցագործության մասին հաղորդագրություն ներկայացնելու լիազորություն ստանա:

Սակայն կառավարությունը, նշելով, որ այլ պատգամավորի փոխարեն քվեարկելը հանրության նկատմամբ հանցանքի աստիճանի վտանգավորություն չունեցող արարք է, բացասական եզրակացություն տվեց նախագծին:

Քրեական օրենսգիրքը

Ազգային ժողովում քվեարկությունների արդյունքներով կազմվում է արձանագրությունը, որում գրված է, թե տվյալ հարցի (օրենքի) վերաբերյալ քանի պատգամավոր ինչպես է քվեարկել: Եվ եթե մի քվեարկության ժամանակ այլ պատգամավորի փոխարեն քվեարկություն է տեղի ունեցել, ապա արձանագրության մեջ տեղ գտած «կողմ», «դեմ» և «ձեռնպահ» քվեարկած պատգամավորների թիվը չի համապատասխանում իրականությանը:

Այսինքն, եթե, օրինակ, որոշումը անցնում է 75 «կողմ» ձայնով, բայց իրականում դրան կողմ են քվեարկել 74 պատգամավոր, որոնցից մեկը նաև այլ պատգամավորի փոխարեն է քվեարկել, արձանագրությունում պետք է նշվի, որ «կողմ» է քվեարկել 74 պատգամավոր… Սակայն այսօրվա պրակտիկայում այդպիսի դեպքերում գրվում է 75, ինչը չի համապատասխանում իրականությանը:

ՀՀ Քրեական օրենսգրքի 314-րդ («պաշտոնեական կեղծիքը») հոդվածը ենթադրում է պատասխանատվություն կեղծ, իրականությանը ակնհայտ չհամապատասխանող պաշտոնեական փաստաթղթեր պատրաստելու համար:

Այսպիսով, կարելի է վստահաբար ասել, որ այլ պատգամավորի փոխարեն քվեարկությունների պատճառով ԱԺ քվեարկությամբ արձանագրությունում սխալ թիվ գրելը հանցագործություն է` ըստ ՀՀ ՔՕ 314 հոդվածի, և այդ մասին ցանկացած մարդ կարող է հաղորդում ներկայացնել (իհարկե, այլ պատգամավորի փոխարեն քվեարկելու փաստը ապացուցելու դեպքում):

Իսկ ընդունված որոշման ճակատագի՞րը

ՀՀ Սահմանադրության 71-րդ հոդվածն ասում է, որ օրենքները և ԱԺ որոշումները ընդունվում են քվեարկությանը մասնակցած պատգամավորների ձայների մեծամասնությամբ, եթե քվեարկությանը մասնակցել է պատգամավորների ընդհանուր թվի կեսից ավելին (67 պատգամավոր):

Այսպիսով, եթե քվեարկության ժամանակ տեղի են ունեցել այլ պատգամավորի փոխարեն քվեարկություններ, և դրանք վճռորոշ են եղել օրենքի ընդունման համար, ապա ԱԺ պատգամավորների 1/5-րդը (27 պատգամավոր) պետք է դիմեն ՀՀ Սահմանադրական դատարան` օրենքը չեղյալ ճանաչելու պահանջով:

Իսկ ահա Սահմանդրական դատարանը, հաշվի առնելով, որ օրենքի ընդունման համար իրականում չեն եղել բավարար թվով պատգամավորների ձայներ, չեղյալ է ճանաչում օրենքը: