![](/static/articles/02/24/l-g51mGR84Oq.jpg)
Պատգամավորները չեն մասնակցում ԱԺ նիստերին
Այսօր Ազգային ժողովի հերթական քառօրյային մեկնարկի պահին գրանցվել էր 80 պատգամավոր: Պատկերը փոխվեց 30 րոպե անց, երբ օրակարգը հաստատվեց, իսկ Հովիկ Աբրահամյանը գնաց «բաց դռների» շրջանակներում ԱԺ ժամանած գյումրեցի ուսանողների հարցերին պատասխանելու: ԱԺ դահլիճում մնաց ընդամենը 13 պատգամավոր: Այս պայմաններում էլ շարունակվեց քննարկվել «Հանրային ծառայության» մասին ՀՀ օրենքի նախագիծը, որով փորձ է արվում կարգավորել պատգամավորների, նախարարների եւ այլ բարձրաստիճան պաշտոնյաների գույքի եւ եկամուտների հայտարարագրին վերաբերող հարցեր:
«Ժառանգություն» խմբակցությունը շարունակում է չմասնակցել Ազգային ժողովի նիստերին: Խմբակցության քարտուղար Ստյոպա Սաֆարյանը «Հետքի» հետ զրույցում ասաց, որ «Ժառանգություն» կուսակցությունն անընդմեջ քննարկումներ է անում եւ անընդհատ անդրադառնում է ԱԺ նիստերին մասնակցել-չմասնակցելու հարցին եւ այս պահի դրությամբ դեռ նպատակահարմար չեն գտնում նիստերին մասնակցել: Երեկ խմբակցության պատգամավորներն օգտվել են ԱԺ ամբիոնից հայտարարություններ անելու իրենց իրավունքից, իսկ այսօր կմասնակցեն ԱԺ-կառավարություն հարց ու պատասխանին:
Ըստ Ս. Սաֆարյանի` «Ժառանգությունը» չի մասնակցում միայն նիստերին, մնացած մասով աշխատում են, հանդես են գալիս օրենսդրական նախաձեռնություններով, առաջարկություններով եւ այլն:
«Մեր այս որոշմանը տրվեց բոյկոտ անվանումը, բայց իմ կարծիքով` այս 4 տարիների ընթացքում իշխանությունն է բոյկոտել նիստերը` այն վերածելով պարզ կոճակասեղմության: Տեսեք, «Ժառանգությունը» դահլիճում չէ, եւ իշխանությունը, լինելով մեծամասնություն, դատարկ դահլիճում է քննարկումներ անցկացնում: Սա նշանակում է որ հենց իշխանությունն է բոյկոտում նիստերը եւ ընդհակառակը, մենք եւ մի քանի այլ պատգամավորներով փորձում էինք քննարկումներ կազմակերպել օրենքի նախագծերի վերաբերյալ, որը ազդեցություն չէր ունենում վերջնական արդյունքների վրա»,- ավելացրեց Ստյոպա Սաֆարյանը:
Մեկնաբանել