Ամանորյա և Սուրբ ծննդյան հանդիսությունների  հերթական տոն դարձավ Վիրահայոց թեմի «Հայարտուն» մշակույթի կենտրոնի Սբ. Գրիգոր Նարեկացու  անվան կիրակնօրյա դպրոցի (ուսուցչուհի  Թամարա Գաբոյան) Սուրբ Ծննդյան տոնին նվիրված հանդեսը, որը տեղի ունեցավ  հունվարի 16-ին Գալուստ Գյուլբենկյան սրահում: Ուրախալի է, որ տոնահանդեսին համատեղ ուժերով իրենց մասնակցությունն էին բերել նաև Ներսես Շնորհալիի  անվան պատանեկան  երգչախումբը (խմբավար՝ Մառա Աբուլյան), «Ջեյրան»  (պարուսույց՝ Սվետլանա  Երիցյան), «Անի» (պարուսույց Անգելինա Նազարյան-Քոչյան) և «Վանք» (պարուսույց  Լիանա Կաշավանիձե) պարային համույթները և  «Սուրբ Գևորգ» առաջնորդանիստ եկեղեցու պատանեկան երգչախումբը:

Տոնահանդեսը սկսվեց ««Հայր մեր» Տերունական աղոթքով և  Վիրահայոց թեմի առաջնորդ  Գերաշնորհ Տեր Վազգեն եպիսկոպոս Միրզախանյանի  օրհնությամբ:

«Հայարտուն» կենտրոնի կրթական  բաժնի պատասխանատու Եվգենյա Մարկոսյանը ներկաներին իրազեկեց Գրիգոր Նարեկացու անվան  կիրակնօրյա դպրոցի մասին, տեղեկացնելով, որ ամեն շաբաթ օր 7-15 տարեկան հասակի տարբեր  դպրոցների  120 աշակերտներ, քաղաքի տարբեր թաղամասերից հաճախում են «Հայարտուն» կենտրոն և Գրիգոր Նարեկացու անվան կիրակնօրյա դպրոցի 5 խմբերում սովորում են  հայոց ոսկեղենիկ լեզուն և հայ ժողովրդի և  Եկեղեցու պատմությունը:  Կրթական բաժնի ղեկավարը հույս հայտնեց, որ  կգա մի օր, երբ  վիրահայոց  համայնքը  շաբաթօրյա և կիրակնօրյա դպրոցների կարիք չի ունենա, և  հայ երեխան  կստանա հայեցի դաստիարակություն:

Այնուհետև  սկսվեց  Սուրբ Ծննդյան  տոնահանդեսը, որը բացի ուրախ և տոնական լինելուց, նաև ճանաչողական-ուսուցողական բնույթ ուներ, քանզի գրական-երաժշտական մոնտաժի ժամանակ դրսևորվեցին Սուրբ ծննդյան և Ամանորի տոնակատարության տարբեր  դրվագները՝ սկսած  Հիսուս Քրիստոսի ծննդից, տոնածառից  և  Ձմեռ պապից: Տպավորիչ էին կիրակնօրյա դպրոցի սաների  հայերեն ճիշտ խոսքը,  մենակատարների  նազելի պարը,  երգչախմբի  վարպետ կատարումները:  

Միջոցառման վերջում օրհնության և գնահատանքի խոսքով հանդես եկավ  Վիրահայոց թեմի առաջնորդ  Գերաշնորհ Տեր  Վազգեն եպիսկոպոս Միրզախանյանը: Բարձր գնահատելով  կիրակնօրյա դպրոցի  ուսուցիչներ Թամարա Գաբոյանի և  Գևորգ սարկավագ Անտոնյանի անձնվեր գործունեությունը, Սրբազան հայրը նրանց համեմատեց այն կամրջի հետ, որը հնարավորություն է տալիս իրենց  մայրենիից  կտրված այս սաներին  վերադառնալ  արմատներին, սովորել  մայրենին, գիտենալ նրա հարստությունն ու զգալ հմայքը:

 Սրբազան Հայրը  իր գոհունակությունը  հայտնեց Վիրահայոց Թեմի «Հայարտուն» մշակույթի կենտրոնի ողջ անձնակազմին   հայապահպան և ազգանվեր գործունեության համար:

Վիրահայոց թեմի մամլո դիվան