Թե ամեն օր մեր համաքաղաքացիներից քանիսն են հայտնվում նման իրավիճակներում, դժվար է պատկերացնել: Մինչ մեր ոստիկանապետը եթերներից ոստիկանության աշխատակիցներին հորդորներ և խորհուրդներ է տալիս, որ բարեկիրթ և հանդուրժող լինեն մեր քաղաքացիների նկատմամբ, ոստիկանության Վանաձորի անձնագրային բաժնի աշխատակիցների վարք ու կարգը հակառակն է ցույց տալիս: Մի գործի համար մարդիկ օրերով հերթ են կանգնում:

Ընդմիջումն արդեն 5-20 րոպե էր, ինչ ավարտվել էր, բայց  դեռ աշխատակիցները չէին բարեհաճել սկսել իրենց աշխատանքը: Մինչդեռ դրսում 25-30 հոգի մարդ էր հավաքվել: Ուշացած աշխատակիցը ներկայացավ ու մի բան էլ ինքը բղավեց հերթից ուժասպառ եղած ծեր կնոջ վրա: Հավաքված մարդիկ դժգոհում էին, որ10 օր է` ձգձգում են անձնագիր տալը: Իսկ բանակից զորացրվածների նախկին հասցեում հաշվառվելը այդ պատճառով նույնպես ձգձգվում է:

Զինկոմիսարիատում Անձնագրային բաժնի տված տեղեկանքի հիման վրա արդեն քաղաքացուն գրանցել են տվյալ հասցեում, իսկ Անձնագրային բաժինը նման տվյալների չի տիրապետում:

Մեր երկրում ո՞ր կառույցն է քաղաքացիներին գրանցում իր հասցեում՝ զինկոմիսարիա՞տը, թե՞ անձնագրային բաժինը: Եթե անձնագրային բաժնի տեղեկանքով զինկոմը արդեն քեզ գրանցում է տվյալ հասցեում, ինչու՞ պետք է քաղաքացին նորից վերադառնա անձնագրային բաժին գրանցվելու համար:

Արդեն կես ժամ էր, ինչ ընդմիջումն ավարտվել էր, բայց աշխատողների մեծամասնությունը չէր եկել աշխատանքի: Հուսալքված մարդիկ նորից վերադարձան տուն, հաջորդ օրը նույն հերթում կանգնելու տհաճ ակնկալիքներով: 

Աննա Վանաձորից