Հունվարի 21-ին Հայաստանի ճարտարապետության ազգային ինտիտուտ-թանգարանում տեղի է ունեցել «ԻԿՕՄՕՍ/Հայաստան» հասարակական կազմակերպության հաշվետու ընտրական ժողովը:

Այն ավարտվել է կազմակերպության նախագահի և վարչության նոր կազմի ընտրությամբ: 2013-2015թթ. համար ԻԿՕՄՕՍ/Հայաստանի նախագահ է վերընտրվել Գագիկ Գյուրջյանը:

Շնորհակալություն հայտնելով առաջիկա 3 տարում իրեն վստահված մանդատի համար՝ Գ. Գյուրջյանը տեղեկացրել է, որ 2013թ. համար միջազգային ԻԿՕՄՕՍ-ն ընտրել է «Կրթության ժառանգությունը» թեման՝ կոչ անելով տարվա ընթացքում նպաստել այդ ժառանգության օրինակների (դպրոցներ, գրադարաններ, ուսումնական հաստատությունների շենքեր և այլն) պահպանությանն ու ճանաչելիության բարձրացմանը:

ԻԿՕՄՕՍ/Հայաստանը ստեղծվել է 2002թ. հունվարին և գործում է որպես Հուշարձանների և տեսարժան վայրերի միջազգային խորհրդի Հայաստանի ազգային կոմիտե: Կազմակերպությանը ներկայում անդամակցում է 64 անդամ, որից 6-ը երիտասարդ պրոֆեսիոնալներ են: