Կառավարությունը վարչապետ Տիգրան Սարգսյանի գլխավորությամբ անցկացված այսօրվա նիստում բացասական եզրակացություն է տվել «Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» օրենքում փոփոխություններ և լրացումներ կատարելու օրենքի նախագծի փաթեթին:

Փաթեթով առաջարկվում է նշված հուշարձանները տեղափոխելու կամ դրանք փոփոխելու ժամանակ հասարակական կարծիքը հաշվի առնելու մեխանիզմ: Փաթեթն օրենսդրական նախաձեռնության կարգով ներկայացրել է Ազգային ժողովի պատգամավոր Էդմոն Մարուքյանը:

Հիշեցնենք, որ կառավարությունը 2012թ. սեպտեմբերի «Պատմության և մշակույթի անշարժ հուշարձանների տեղափոխման մասին» իր որոշմամբ թույլատրել էր մարզերից Երևան տեղափոխվել մի շարք հուշարձաններ բեկորներ: Հուշարձանների տեղափոխումն առաջացրել էր բազմաթիվ մարդկանց, այդ թվում նաև մասնագետների խիստ դժգոհությունը: Նրանք հուշարձանների տեղափոխումը համարում էին անընդունելի և պահանջում Երևան բերված նմուշները վերադարձնել իրենց տեղը:

Եթե Էդմոն Մարուքյանի առաջարկած օրենսդրական փոփոխություններն արժանանային կառավարության հավանությանը, հուշարձանները հնարավոր չէր լինի տեղափոխել՝ առանց հասարակության կարծիքը հաշվի առնելու: