Փոխվարչապետ, տարածքային կառավարման նախարար Արմեն Գեւորգյանն այսօր ընդունեց Համաշխարհային բանկի (ՀԲ) պատվիրակությանը՝  հայաստանյան գրասենյակի տնօրեն Ժան Միշել Հափիի գլխավորությամբ: Հանդիպմանը ներկա էին նաեւ ՏԿՆ Ջրային տնտեսության պետական կոմիտեի նախագահ Անդրանիկ Անդրեասյանը  եւ  «Ջրային տնտեսության զարգացման եւ բարեփոխումների ծրագրերի իրականացման գրասենյակ» ՊՀ տնօրեն  Ադիբեկ Ղազարյանը: 

Քննարկվեցին ոռոգման համակարգում համագործակցությանն առնչվող հարցեր: Փոխվարչապետը նշեց, որ ոռոգման համակարգի զարգացման խնդիրները  շարունակում են առաջնային լինել ՀՀ կառավարության համար, առաջիկա տարիներին նաեւ մեծ ուշադրություն է  դարձվելու ջրամբարաշինության ոլորտին:  Նա  շնորհակալություն հայտնեց  համակարգի զարգացման եւ վերականգնման գործում ՀԲ օժանդակության համար` միաժամանակ ընդգծելով  ՀԲ աջակցությամբ իրականացվող ծրագրերի արդյունավետությունը:

Կողմերը քննարկեցին նաեւ ոռոգման համակարգում իրականացվելիք նոր ծրագրի կառուցվածքին, բաղադրիչներին առնչվող հարցեր: Մասնավորապես նշվեց,  որ այս    ծրագրի հիմնական բաղադրիչը եւս լինելու է  ենթակառուցվածքների զարգացումը:

Անդրադարձ եղավ նաեւ առաջիկա ամիսների ընթացքում ջրային ռեսուրսների կառավարմանը նվիրված համատեղ խորհրդաժողովի կազմակերպման հնարավորությանը: 

ՏԿՆ հասարակայնության հետ կապերի բաժին