Տեսանյութեր
Լուսանկարներ
Սերժ Սարգսյանի նախընտրական շտաբը՝ պատմաազգագրական թանգարանում
ՀՀ նախագահի թեկնածու, գործող նախագահ Սերժ Սարգսյանի Էջմիածնի նախընտրական շտաբներից գլխավորը գործում է քաղաքի պատմաազգագրական թանգարանի շենքում:
Մեր այցելության պահին թանգարանի ներսում՝ ցուցանմուշների կողքին, շարված էին նախագահի թեկնածուի նախընտրական քարոզչանյութերը, իսկ թանգարանի տնօրենի ընդունարանում մի քանի երիտասարդ համակարգչի առջև նստած շտաբի աշխատանքներով էին զբաղված: Նրանց աշխատանքը հսկում էր մի քանի հանրապետական, որոնք ելումուտ էին անում և ցուցումներ տալիս:
Թանգարանի տնօրեն Հասմիկ Հակոբյանը տեղում չէր: Ասացին, որ նա ձեռքը կոտրել է և աշխատանքի չի գալիս: Թանգարանի տարածքում այդպես էլ ոչ մի աշխատակցի չգտանք. տարածքն ամբողջությամբ ՀՀԿ-ականների «տիրապետության» տակ էր: Շարքային ՀՀԿ-ականները չէին ցանկանում որևէ մեկնաբանություն անել, թե ինչպես է նախընտրական շտաբը հայտնվել համայնքային ենթակայության տակ գործող թանգարանում:
|
Թեկնածուները, համամասնական ընտրակարգով ընտրություններին մասնակցող կուսակցությունները, կուսակցությունների դաշինքներն ընտրություն նշանակվելուց հետո կարող են կազմավորել ընտրական շտաբներ: Ընտրական շտաբները չեն կարող տեղակայվել պետական և տեղական ինքնակառավարման մարմինների զբաղեցրած շենքերում (բացառությամբ այն դեպքերի, երբ շտաբները զբաղեցնում են այդ մարմիններին չպատկանող տարածք), ինչպես նաև այն շենքերում, որտեղ գործում են ընտրական հանձնաժողովները: ՀՀ ընտրական օրենսգիրք, հոդված 18. կետ 5 |
Էջմիածնի քաղաքապետ Կարեն Գրիգորյանը «Հետքի» հետ զրույցում ասաց, որ այս տարածքը միշտ եղել է նախընտրական շտաբ՝ սկսած 1990-ականներից, և թանգարանն է այլ վայրից տեղափոխվել այդ տարածք:
Նշենք, որ ՀՀԿ-ականները նույն տարածքում նախընտրական շտաբ բացել էին նաև 2012թ. խորհրդարանական ընտրությունների ժամանակ:
Մեկնաբանել