![](/static/articles/22/88/l-M32H5osqrQ.jpg)
Արա Հովսեփյանը թաքցնում է շինընկերության խոտանը
«Հազարամյակի մարտահրավերներ» ծրագրով կառուցվող երրորդ կարգի ջրանցքին Արմավիրի մարզի Հովտամեջ և Ծիածան գյուղերի բնակիչերը երկար են սպասել, քանի որ մեկ տարի է, աշխատանքներն այդպես էլ ավարտին չեն հասցվում: Թվում էր, թե այս ամիս աշխատանքները վերջապես կավարտվեն, և գյուղացիները մարդավարի ոռոգման ջուրը կհասցնեն իրենց հողամասեր, սակայն այս անգամ էլ պարզվեց, որ շինարարական ընկերությունը սխալ է նախագծել և մեծ կիսախողովակների փոխարեն տեղադրել է անհամեմատ փոքր կիսախողովակ:
Երկու գյուղերն իրարից բաժանող ճանապարհը օրեր շարունակ լցված է ջրով: Առվակների ջուրը հոսում է փողոցներով և լցվում գյուղացիների հողերը` պատճառելով զգալի վնասներ:
Գյուղացիների բողոքներից և տարածքային կառավարման նախարարության միջամտությունից հետո կիսախողովակները նորից փոխվում են:
«Հազարամյակի մարտահրավերներ» ծրագրի գործադիր տնօրեն Արա Հովսեփյանը, ով ամեն առիթով հայտարարում է, թե բաց ու թափանցիկ է աշխատում, այս անգամ ևս փորձում է հասարակական հնչեղությունից հեռու պահել այս խոտանը: Ճիշտ է` «Հազարամյակի մարտահրավերներ» հայաստանյան ծրագրի գրասենյակի լրատվության պատասխանատու Նանե Աճեմյանը հաստատեց, որ խնդիրն առաջացել է նախագծող ընկերության սխալի հետևանքով, սակայն Արա Հովսեփյանի հետ զրուցելուց հետո հրաժարվեց ասել նախագծող ընկերության անունը: Պարզվում է` Արա Հովսեփյանը չի կամենում ամեն ինչ բարդել շինընկերության վրա, և այն «պաշտպանելու» քաղաքականություն է որդեգրել:
Ինչ վերաբերում է կիսախողովակները փոխելու հետևանքով ծախսված հավելյալ գումարների չափին, ապա «Հազարամյակի մարտահրավերներից» դարձյալ տեղեկություն չտրամադրեցին` պատճառաբանելով, թե գումարի չափը դեռ պարզ չէ: Թե ինչու է Արա Հովսեփյանը կոծկում «Երևանշին» ընկերության սխալները, հայտնի չէ:
Հիշեցնենք, որ «Հետքը» դեռ նախորդ տարի էր անդրադարձել այս գյուղերի համար անցկացվող կիսախողովակների խնդրին: Այն ժամանակ էլ շինարարական ընկերության մեղքով աշխատանքները մի քանի ամիս կանգ առան, ինչը պատճառաբանվեց բետոնե կիսախողովակների արանքներում դրվող ռետինե կտորների անորակ լինելով: Անորակությունը նկատել էր ամերիկյան կողմը և պահանջել, որ շինարարը անորակ ռետինները փոխարինի որակյալներով: Այդ ժամանակ նույնպես Արա Հովսեփյանը «Հետքին» պարզաբանում չէր տվել:
Հովտամեջի գյուղապետ Արմեն Սարգսյանը տեղյակ չէր, թե ով է նախագծող ընկերությունը: Գյուղապետը խորհուրդ տվեց դիմել «Հազարամյակի մարտահրավերներ» ծրագրի ղեկավարությանը:
«Ես չգիտեմ, թե որ ընկերությունն է նախագծման աշխատանքներն իրականացրել: Աշխատանքների ավարտման ժամկետների մասին էլ չգիտեմ: Ծրագիրն արդեն պետք է ավարտված լիներ, պարզապես կիսախողովակների չափերը չէին համապատասխանում պահանջներին. տարածքային կառավարման նախարարի կարգադրությամբ նորից փոխվում են, քանի որ ջուրը մեզ չի հերիքում»,- ասաց համայնքապետը:
«Խոյ» ջրօգտագործողների ընկերության գործադիր տնօրեն Սեյրան Սարգսյանն էլ ասաց, որ գյուղացիներին ժամանակին ջուր հասցնելու համար կիսախողովակների կողքից` հողի վրա, ժամանակավոր առու են բացել, մինչև կիսախողովակները փոխվեն:
Ս. Սարգսյանի հավաստմամբ` Հովտամեջում շինաշխատանքները կսկսվեն մոտ մեկ շաբաթից, քանի որ հիմա հացահատիկի և կարտոֆիլի ոռոգման եռուն շրջանն է, և ոռոգման ջուրը չեն կարող կտրել, իսկ հունիսի 20-ից արդեն պայմանավորվածություն ունեն, որ «Երևանշին» ընկերությունը սկսի կիսախողովակները փոխելու աշխատանքները:
«Այդ ժամանակ ոռոգման ջրի քանակը կկրճատենք, աշխատանքները մի 5 օրում կավարտենք: Ժամանակին ճիշտ հաշվարկներ չարվեցին, գյուղացիներն էլ պահանջեցին, որ այդ առուներով ջուր տան իրենց, նախագծողներն էլ հաշվարկը խախտեցին, ու արդյունքում այլ որակ ստացվեց»,- պարզաբանեց ՋՕԸ-ի տնօրենը:
Հարևան Ծիածանի համայնքապետ Խաչիկ Գևորգյանն արդեն բավարարված է, քանի որ կիսախողովակներն արդեն փոխվել են` շուրջ 266 մետր: «Առաջ գոհ չէի, բայց հիմա լավ է»,- ավելացրեց գյուղապետը:
«Երևանշին» ընկերությունից պարզաբանում ստանալ չհաջողվեց: Մի քանի օր է, ընկերության հեռախոսներին պատասխանող չկա:
Գյուղացիները դեռ վստահ չեն, որ «Հազարամյակի մարտահրավերներ» ծրագրով Հովտամեջ և Ծիածան գյուղերի կիսախողովակների վրա կատարվող աշխատանքները այս անգամ վերջինը կլինեն:
Մեկնաբանություններ (2)
Մեկնաբանել