Լոռու մարզի Գոգարան գյուղի մշակույթի տան եւ մանկապարտեզի շենքերն ավերվել են 1988թ.-ի երկրաշարժի ժամանակ: Անցած 25 տարիներին աղետի գոտու պետական ծրագրից դուրս է մնացել երկրաշարժից տուժած գյուղում  մշակույթի տուն ու մանկապարտեզ կառուցելու հարցը:

Համայնքապետարանի աշխատակազմի քարտուղար Սիլվա Թորոսյանը տեղյակ չէր, թե անցնող տարիներին մշակույթի տան եւ մանկապարտեզի նոր շենքերի կառուցումն ինչու է դուրս մնացել աղետի գոտու պետական ծրագրերից: Սակայն հայտնեց, որ  նշված ծրագրով նախատեսվել է երկրաշարժից անօթեւան մնացած գոգարանցիների համար կառուցել 50 անհատական բնակարան, որոնց մի մասը դեռեւս չի ավարտվել:

Իրականացվող անհատական բնակարանային շինարարության  ընթացքի մասին «Հետքին» «Գլենդել Հիլզ» շինարարական կազմակերպությունից հայտնեցին, որ Գոգարանում 1988թ.-ի  երկրաշարժի հետեւանքով անօթեւան մնացած ընտանիքների համար բնակարանաշինությունն իրականացվում է պետական ծրագրով:

Առ այսօր գյուղում շահագործվել է 35 անհատական բնակարան, 3-ը եղել է անավարտ, 15 անհատական բնակարանների  շինարարությունն ընթացքի մեջ է: «Գլենդել Հիլզ»-ից տեղեկացնում են, որ գյուղում այս պահին շինարարության ընթացքը դադարեցվել է եղանակային պատճառով:

Գոգարանցիներն իրենց ամենամեծ խնդիրը գործազրկությունն են համարում: «Գյուղացին աշխատանքը սիրում ա, պայմաններ չկա»,- ասաց հաշվապահ Գրիշա Ղազարյանը: Գոգարանը 640 հա վարելահող ունի, որից գյուղացիների ասելով հազիվ 10%-ն են մշակում:

«Գյուղացին, որ էդքան հող ունենա, ինքը խանութից ալյուր առնի, էլ ուրիշ հարց կարելի՞ է տալ»,- հայտնեց գյուղամիջում գլուխ-գլխի հավաքված տղամարդկանցից Սարգիս Պետրոսյանը: Վերջինս ներկայացրեց  նաեւ գյուղի անգործ երիտասարդների  վիճակը: «Դուք առավոտից էստեղ լինեք՝ կտեսնեք, էստեղ հավաքվում են գյուղի մոտ 200 երիտասարդ, սաղ աշխատող ձեռք`պարապ պատի տակին նստած: Որ պատերի տակին վեր թափած լինենք, ո՞նց կլինենք: Իրա հողը, ով մի երկու մետր ցանում ա, դրանով յոլա է տանում իրա ընտանիքը»,- ասաց  Սարգիս Պետրոսյանը: 

Գոգարանցիները գյուղում ապագա չեն տեսնում: Նրանց մոտ 80%-ն արտագնա աշխատանքի է մեկնում: Գոգարանցի Ռոբերտ Գասպարյանն ասաց, որ 1 հա հողի վրա 200 հազար դրամ է ծախսվում, դրա արդյունքներն ստանալիս էլ հույսը դնում է Աստծո վրա:

Սիլվա Թորոսյանը	Ռոբերտ Գասպարյանը

«Ես տարեկան 6 հա հողի վրա 1 մլն դրամ եմ ծախսում, ինչքան հնարավոր է արդյունքը ստանում եմ»,- ասաց  Ռոբերտը: Գյուղը խմելու եւ ոռոգման ջրի խնդիր չունի: Ինչպես գյուղացիներն են ասում՝ ամեն ինչ կա, փող չկա: «Լոդր ժողովուրդ չենք, աշխատող ժողովուրդ ենք, բայց գումար չկա, որ հողի վրա դնենք ու ստանանք: Մի քանի հոգի են գյուղում: Մեկի տղան Ռուսաստանից փող ա ուղարկում հնարավորություն է ունենում հողը մշակելու, բայց որի տակն էլ փախած ա, չեն կարողանում հողը մշակել»,- բացատրեց Ռոբերտը: 

Գոգարանն ունի 1472 բնակիչ, 338 ծուխ, որոնցից 269-ն ընդգրկված են «Փարոս» համակարգում: Նրանցից 175-ը նպաստառուներ են: Համայնքապետարանի աշխատակազմի քարտուղար Սիլվա Թորոսյանի ասելով գյուղի ընտանիքների 50%-ը սոցիալապես խիստ անապահով են: Հաշվապահ Գրիշա Ղազարյանն էլ ավելացրեց, որ համայնքապետ Գալոյանը համայնքի 30 մլն դրամ բյուջեից 3 մլն դրամ նախատեսել է սոցիալապես անապահով ընտանիքներին օգնելու, 1,7 մլն դրամ էլ ուսանողների ուսման վարձի վճարմանն աջակցելու համար:

Սարգիս Ռուշանյանի ընտանիքը

Սարգիս Ռուշանյանի տունը 15 օր առաջ հրդեհ էր բռնկվել եւ այրվել էր երեխաների ամբողջ հագուստը, մի քանի օր հետո էլ սատկել էր միակ ձին: Սարգիսի 6 երեխաներին օգնության ձեռք են մեկնել բարեկամներն ու հարեւանները՝ երեխաներին հագուստ են տրամադրել: «Սակայն համայնքապետից որեւէ աջակցություն չստացա»,- ասում է Սարգիսը: 

Համայնքապետարանի հաշվապահից խնդրեցի Գոգարանի 2013թ.-ի բյուջի մեկ օրինակ: «Դուք ինձ մի թուղթ կտա՞ք, որ պահանջել եք բյուջեի մի օրինակը»,- հարցրեց հաշվապահ Գրիշան: Նկատելով զարմացած հայացքս Սիլվա Թորոսյանը բացատրեց. «Գիտե՞ք ինչու է թուղթ ուզում, մեզ վճարում են տեղեկատվություն հաղորդելու համար, բայց դուք մի վճարեք, պետք չի»:

Ս. Թորոսյանը տրամադրեց գյուղի 2013-2016 թթ.-ի զարգացման քառամյա ծրագիրը, որով համայնքապետ Արթուր Գալոյանը նախատեսել է կառուցել 20 բնակարան, դպրոցի մարզադահլիճ, մշակույթի տուն եւ համայնքային կենտրոն: Համայնքապետը նախատեսել է վերանորոգել նաեւ Գոգարանի խմելու ջրի ներքին ցանցը, բարելավել գոգարանցիների սոցիալ-տնտեսական պայմանները, բարեկարգել համայնքի ներքին ճանապարհները:

Քառամյա ծրագրում նախատեսված խնդիրների իրագործման ֆինանսական որեւէ աղբյուր չի հիշատակվում, որի պատճառով բազմահոգս Գոգարանի զարգացման քառամյա ծրագիրն իրենից անարժեք թուղթ է ներկայացնում: